1. Kraton Sumedhanglarang
M
|
ulabukane Kraton
Sumedhanglarang kuwi mujudake perangane Kraton Sundha sing kuthagarane mapan
ing Kawali. Kraton kuwi yasane Prabu Resi Tajimalela.Nalika samana sing dadi
ratu ing Kraton Sundha Prabu Ragamulya. Kuthagara Kraton Sumedhanglarang mapan ing Gunung Tembong Agung.
|
Kraton
Sumedhanglarang mujudake kraton sing duwe wates karo Kraton Galuh ing sisih
kidul. Kraton Cirebon ing sisih lor wetan lan Kraton Pajajaran ing sisih kulon.
Sawise
Prabu Resi Tajimalela seda , sing gumanti nata putrane sing asma Gajah Agung.
Gajah Agung jumeneng nata jejuluk Prabu Gajah Agung. Nalika Prabu Gajah Agung
ngemban pusaraning praja, punjering kraton dipindhah saka Gunung Tembong Agung
menyang Cicanting.
Sawise
Prabu Gajah Agung Seda sing dadi ratu ing Kraton Sumedhanglarang, putrane sing
asma Prabu Wiraraja. Nalika samana kuthagara dipindhahake saka Cicanting
menyang Cipameungpeuk. Prabu Wiraraja sabanjure kondhang minangka Sunan
Pagulingan.
Prabu
wiraraja utawa Sunan Pagulingan duwe putra cacah loro. Sing mbarep mijil putri
asma Raden Ayu Raja Mantri utawa Ratu Ratnasih lan sing kakung Asma Raden
Mertalaya.
Sawise
Prabu wiraraja utawa Sunan Pagulingan seda sing gumanti ratu Raden Mertalaya
kanthi gelar Sunan Guling. Dene raden Ayu raja Mantri utawa Ratu Ratnasih
kapundhut garwa Sripadhuka Maharaja saka Pakuan Pajajaran.
Raja
Sumedhanglarang sing kaping papat iki, sawise seda diganti putrane sing asma
Raden Tirta Kusuma. Kanthi gelar Sunan Patuakan.
Sunan
Patuakan sawise surut diganti putrane pambayun sing mijil putri asma Raden Ayu
Sintawati. Raden Ayu Sintawati kapundhut garwa Sunan Corendha.
Raden
Ayu Sintawati karo Sunan corendha patutan siji asmane Raden Ayu Satyasih.
Raden
Ayu satyasih kaangkat pinangka panguwasa ing Medhanglarang kanthi Sesebutan Pucuk Umum. Nalika jamane Pucuk Umum iki agama
Islam sumebar ing kraton Sumedhanglarang. Mligine sing disebarake dening
Pangeran Santri.
Pucuk
Umum wusanane kapundhut garwa Pangeran Santri, satemah Pucuk Umum ngrasuk agama
Islam. Wiwit kuwi Pangeran Santri diwisudha minangka panguwasa Sumedhanglarang.
Kanthi jejuluk Ki Gedheng Sumedhanglarang. Panjenengane kuwi panguwasa
Sumedhanglarang sepisanan sing ngrasuk agama islam. Lan nalika samana
Sumedhanglarang kebawah kraton Islam Cirebon.
Ki
Gedheng Sumedhang kagungan putra kakung sing asmane Raden Angka Wijaya. Nalika
Raden Angka Wijaya umur 19 tahun, dheweke kautus Ramane supaya menyang Pajang,
saperlu ngangsu kawruh kanuragan,pamarintahan lan kawruh agama.
Ing
jaman samana Kraton Pajajaran wus meh runtuh amarga serangan saka Kraton
Surasowan Banten sing dipandhegani Sultan Hasanudin. Nalika samana Kraton Pajajaran sing ngasta pusara Prabu
Nilakendra, ngalami jaman sing ngrekasa. Pamarintahan saya ringkih, Ratune
malah mung seneng-seneng, sarta mabuk-mabukan, satemah dheweke ora kuwawa
nanggulangi serangan-serangan saka Banten sing terus-terusan.
Bregada
gecak kuwi terus ngrabasa kuthagara ing
Kraton Pajajaran. Ing kahanan tanpa daya kuwi, Sang Prabu Nilakendra ngoncati
pabaratan ninggalake Kraton Pajajaran.
Sabanjure
Prabu Nilakendra ilang emboh menyang ngendi parane. Mbok manawa dheweke seda
ana tengahing wana amarga nandhang raga.
Kuthagara
Pakuan isih dikuwasani para penggedhe Kraton Pajajaran. Lan dheweke padha
mbudidaya kanthi tohing nyawa kanggo mbelani Kraton. Untung wae kanthi anane
kali lan benteng pertahanan, Kraton isih bisa dislametake.
Emane
wiwit Prabu Nilakendra ninggalake Kraton, Pakuan ora dadi punjering Kraton
maneh. Saperangan kawula ana sing ngungsi menyang wewengkon pante kidul, gawe
desa anyar ing Cisolok lan Bayah.
Sawetara
kuwi, ubarampe lan tandha-tandha keagungan Pajajaran dipasrahake marang
Senapati Jaya Prakosa lan adhi-adhine yakuwi Wirajaya, Kondhang Hapa, lan
Pancarbuwana. Dheweke terus ngungsi menyang pernah wetan nganti tekan Sumedhanglarang.
Lan
saperangan kawula ana sing ngungsi mengalor ngulon sing dipangarsani Sang
Ragamulya Suryakencana sing sabanjure kaangkat dadi Raja Pajajaran ana ing
pangungsen. Dheweke padha ngedekake punjering kraton ing Gunung Pulosari,
Pandeglang, ing kampung Kaduheja, Kecamatan Menes,Kabupaten Pandeglang.
Ganti
kang kinocap. Ora kaya lakune Raden Angka Wijaya sing kautus ramane Ki Gedheng
Sumedhang, supaya menyang Kraton Pajang. Saperlu ngangsu kawruh kanuragan,
pamarentahan lan kawruh agama Islam.
Nalika
samana Raden Angka Wijaya lakune saka Kraton Sumedhanglarang wis tekan
Pelabuhan Cirebon. Dheweke ngagem sandhangan khas Parahyangan. Iket latar biru
tuwa corek bathik ireng putih, clana pangsi lan rasukan takwa ireng. Dheweke sawijining
nom-noman sing udakara umure 19 tahun lan wis ngancik dhiwasa. Wadanane
sumringah, netrane sumunar solahe cukat trengginas.
|
Wis
rong dina rong wengi olehe ngenteni tekane kapal saka Banten sing arep padha
labuhan ana dermaga. Sabanjure dheweke bakal mbacutake laku menyang Demak.
Sawise
Sawetara anggone ngenteni kapal saka Banten durung teka, dheweke mlaku-mlaku
ing gisiking laut. Dheweke mlaku karo ngulati sesawangan kang endah aneng
sapinggiring samodra.Nalika samana dheweke leren sawetara ana sangisoring wit
klapa.
Swasana
pante wis sepi nyenyet datan ana sabawaning manungsa. Sing ana mung manuk camar
sing mabur ngideri unthuking banyu, sadhela maneh bakal mulih menyang susuhe.
Saka kadohan katon wit bakau sing njaga pante saka kikisaning samodra. Katon
saklebatan ubur-ubur padha nglangi sarimbitan runtung-runtung rerentengan. Angin
sumilir tumempuh ing daratan mlaku munggah aneng pucaking haldaka. Bagaskara
wancine wus angslup ninggalake rahina lumebu ing pagulingan.
Sawetara
anggone leren ana sangisore wit klapa, ngulati endahing sesawangan wayah sore
nuli dheweke lumebu ing padunungane juru labuh
pante. Durung sawetara suwe dheweke ketemu karo sawijining pawongan
setengah umur , pawongan kuwi ora liya Ki Juru Labuh. Ki juru Labuh kuwi
pawongan sing tunggu pelabuhan lan gawene njaluki pajek ing pelabuhan utawa
sinebut juru mupu bea.
“Kula
nuwun Pak.”
“O,Mangga,
Nak. Yen ora kleru panduluku, sampeyan kuwi rak wis rong dina ana kene. Napa
nunggu kapal saka Banten,Nak?”
“Leres,Pak.
Kok Bapak pirsa?”
“Ya,
mesthi. Kula rak juru mupu bea ing pelabuhan.Dadine saben dina kula mesthi ana.O,
iya ditepungake wae aku Ki juru Labuh. Lha , sampeyan sapa?”
“Nami
kula, Angka Wijaya,Ki.”
“Angka
Wijaya?Napa sampeyan saking Sumedhanglarang?”
“Inggih,Ki.”
“Menawi
ngaten panjenengan menika Pangeran Angka Wijaya.” Ki Juru terus kebak urmat
marang Angka Wijaya.”Kula nyuwun pangapunten Raden. Kula mboten mangertos manawi
panjenengan punika Putra Sumedhanglarang.”
“Mboten , napa-napa,Ki. Mboten sah pekewet.
Manawi nimbali kula cekap Angka Wijaya ,ngaten mawon.”
“O,
Inggih, matur nuwun.Panjenengan saestu turuning priyantun ingkang luhuring
budi, kados ingkang Rama,ingkang tansah
lembah manah.”
“Ampun
kesangeten ngalembana,Ki.!Mbok bilih mbenjang utawi mbenjangipun malih, kula
sampun benten.”
“Kula
pitados, panjenengan tansah sae, Raden.”
“Kok
raden ta Ki?”
“O,
inggih ,Nak Angka Wijaya.”
“Nyuwun
ngapunten Ki, kula badhe nyipeng wonten papan bangsal ngriki napa kepareng?”
“Nyuwun
panganpunten, kados pundi upami wonten griya kula kemawon. Mriki kirang
prayogi, lha namung kados ngaten kawontenanipun.”
“Mboten,
mangke malah ngrepoti Ki Juru. Kula wonten bangsal ngriki mawon kalih ngentosi
rencang.”
“Sinten
rencangipun, Nak.?”
“Ki
Srengga, kalih Ki Pawang.”
“O,
pengawal panjenengan?”
“Inggih,
Ki.”
“Lha
badhe tindak pundi ta Nak?”
“Badhe
dhateng Pajang, ngemban dhawuh saking Rama.”
“Badhe
sowan Kanjeng Sultan Hadi Wijaya?”
“Inggih,Ki.Badhe
ngangsu kawruh kanuragan, pamarentahan lan agami, dhumateng panguwasa Pajang.”
“O,
inggih, mumpung tasih anem, sae manawi ngangsu kawruh, Mugi-mugi panjenengan
mbenjang saget gumantos kalenggahanipun ingkang Rama. Dados nalendra
Sumedhanglarang ingkang wicaksana.”
“Amin.
Pangestunipun mawon Ki.”
”Inggih,Nak.”
Lagi
wae rampung olehe guneman kedadak ana pawongan loro sing padha mlaku nyedhaki
papan kuwi.
“Nyuwun
ngapunten,Nak. Napa priyantun kalih menika rencang panjenengan, Ki Srengga,
kaliyan Ki Pawang ?”
“Inggih
leres ,Ki Juru.”
Bareng
pawongan loro kuwi weruh Raden Angka Wijaya ana kono age-age dheweke mlebu
bangsal labuhan.
“Kula
nuwun...”Uluk salame Ki Srengga lan Ki Pawang.
“Mangga.”Wangsulane
Ki Juru lan Raden Angka Wijaya.
“Wadhuh,Raden.
Panjenengan wau tindak pundi ,kok kula padosi mboten pinanggih?”Ature Ki
Srengga.
“Sing
gedhe pangapurane Paman. Aku mau ngrasakake jeleh ana pelabuhan, Terus
mlaku-mlaku ana gisiking samodra, bareng wis peteng terus mrene, menyang
bangsal iki, ketemu Ki Juru Labuh.”
“Lajeng menika mangke awake piyambak nyipeng
wonten pundi,Den?” Pitakone Ki Pawang.”
|
“Manawi kepareng nyipeng wonten griya kula
mawon,Den.”Ki Juru Labuh nawakake omahe maneh.
“O,
inggih prayogi ngaten Raden.”kandhane Ki Srengga.
“Menapa
mboten damel repot panjenengan ,Ki Juru?” Pitakone Raden Angka Wijaya.
“Mboten,manawi
kersa malah kula matur nuwun sanget.”
Sabanjure
Raden Angka Wijaya lan pengawale loro Ki Srengga lan Ki Pawang padha nginep ana
ngomahe Ki Juru Labuh.
Ki
Juru labuh seneng banget nampa tamune telu kuwi, prasasat kajugrugan gunung
madu. Bombong mongkok ditamoni anak ratu.
Dina
esuke ana kapal sing wis tekan dermaga Cirebon.Pranyata kapal kuwi sing dienteni.
Lan ing dina candhake kapal kuwi wis mlaku ninggalake Pelabuhan Cirebon tumuju
Menyang pelabuhan Demak.
Rasa
sedhih rumasuk menyang atine Angka Wijaya amarga pancen lagi sepisan iki
dheweke ninggalake tanah kelahirane. Dheweke ninggalake kabeh kasenengane ing
Kraton Sumedhanglarang.
Sajroning
pengangen –angene kumlebat wewayangane Ramane Ki Gedheng Sumedhang sing wis
katon ringkih nanging tetep semangat lan Ibune sing tansah nguja apa sing
dikarepake.
‘Putraningsun
Angka Wijaya.’ Ngendikane Ki Gedheng Sumedhang. ‘Begja sira, amarga sira ingsun
pilih ing antarane kadangira. Ingsun keparengake, sira besuk kang gumanti
kalenggahaningsun ngasta pangwasa ing Praja Sumedhanglarang. Mulanira
kalodhangan iki pigunakna kanggo ngudi undhaking ngilmu ing Karaton Pajang!’
‘Ya
ing kana sira bakal antuk wewarah lan wewuruk saka Kanjeng Sultan Hadi Wijaya.
Sawijining Sultan kang duking nguni kaprah sinebut Jaka Tingkir. Nawala ingsun
aturna Panjenengane. Muga-muga karsa ngangkat sira dadi putra siswane.’
‘Sembah
nuwun Rama Prabu, Kawula badhe tansah ngestokaken dhawuh timbalan Dalem.’Wangsulane
Raden Angka Wijaya.
‘Lan
iki pesen ibumu,ngger,’ Ngendikane Dewi Sintawati.’Haywa limput kuwajibanira
bekti mring kang Maha Kuwasa. Jejegna niat lan tindakna samubarang kanthi tulusing
nala. Undhakna pambudidaya dimen sira kasil ing pamulangan. Tindak-tanduk
tansah dijaga, ngelingana ana prajane liyan. Amarga sepisan sira tumindak
kurang prayoga , salawase urip bakal didakwa tansah tumindak ala. Tan sira wae
kang antuk duraka , nanging kabeh kulawarga lan kawulamu bakal nampa piala.
Awit satemene sira iku dhuta nagara Sumedhanglarang. Elinga mring piwelinge
Ibu, Mung pamujiku wae kang ngrowangi tindakmu.’
Kaya
ngono kuwi, genti genten wong tuwane loro tansah aweh piweling kang migunani
banget tumraping Angka Wijaya. Lakon iki dudu golek seneng, nanging lakune wong
golek ngilmu. Lan satemene mujudake laku sawijining Pangeran tumuju pucuking
pangwasa minangka Nalendra.
Sumedhanglarang
saya adoh ditinggalake ing tanah Parahyangan. Saeba endahe Kuthamaya, kuthagara
sing sisih elore ngadek Gunung Tampomas sing katon gagah, prasasat sawijining
prajurit tumbuk kemit sing tansah njaga negarane. Kaapit-apit gunung cilik loro
minangka bebetenge kuthagara. Lan kali Cipeles sing mili ing tengah-tengahing
kuthagara amewahi endhaing swasana.
“Kanjeng
Pangeran, wonten menapa panjenengan ketingal sajak menggalihaken samukawis?” Ature Ki
Pawang lan Ki Srengga.
“Ora,
Paman. Mung aku kelingan Sumedhanglarang.”
“O,
Mboten dados menapa Pangeran.”
“Inggih
sampun limrah, priyantun ingkang nembe
tindak tebih tansah dipun godha kaliyan sesawangan ing griyanipun. Lngkung-langkung Pangeran nembe yuswa 17
tahun. Yuswa ingkang tasih kebak grenjolan lan perjuangan madosi jati dhiri.
Kawula kala emben nalika ninggalaken griya kula ing lerenging redi Tampomas,
awrat sanget raosipun. Langkung-langkung sareng dumugi Kuthamaya mboten gadhah
sanak sedherek. Raosipun kados wonten ing papan sanes.”
“Leres
Pangeran Anem, Mboten sah menggalihaken Kuthagara Kuthamaya. Ewasemanten cobi,
mangga dipun gatosaken kaeandahaning alam sakiwa tengen menika. Kanthi mekaten
saget ngaturaken suka sukur ing ngarsaning Gusti Ingkang Maha Kuwaos. Cobi
dipun pirsani sakiwa tengenipun Kapal. Samenika sampun wonten tengahing laut
Jawa. Mrika wonten layar ingkang sampun
megrok pethak-pethak, kados nyempyok tepining jalanidhi. Ombak ingkang tumempuh
tetep dipun liwati.”
Pangeran
Angka Wijaya wiwit ngulati sakiwa tengene. Pancen bener mendah apike alam ing
sakiwa tengene. Sakiwa tengen kapal mung banyu wae, prasasat kapale mung sak
tabon klapa kang sinurung banyu mrana–mrene. Mung juru mudhi sing tansah mratitiske supaya
kapale mlaku menyang arah mangetan.
Manuk-manuk
ing laut kadhangkala padha nyamber menyang banyu , nyaut iwak pinangka mangsane.
Saka kadohan katon iwak lumba-lumba sing katon sajak nenuntun lakuning kapal
tumuju enere.
Ing
sikile langit biru, laute ketemu karo langite satemah kayadene bunderaning
garis. Pancen kudune dheweke enggal ngilangake wewayangan ing sajroning Kraton.
Gumanti mirsani endahing swasana pinangka panglipuring ati. Mesthi wae para
punakawane padha seneng atine lamun bendarane wis lejar penggalihe.
Prahu
layar terus maju menyang pernah sisih wetan. Nalika prahu kuwi menggok ngidul ,
dheweke weruh ana sawijining kali, sajake prahune bakal ngliwati kono. Kanthi
alon prahune nyedhaki kali kuwi jebul ing kono papan panggonane pelabuhan Muara
Demak.
“Ngajeng
menika Pelabuhan Muara Demak, Den.”Kandhane juru Nahkodha nalika ngulati Raden
Angka Wijaya nggatekake pelabuhan kuwi.
“O,
inggih,Pak.”
“Menapa
badhe tindak Demak?”
“Mboten,
namung liwat mawon.”
“Lajeng,
badhe tindak pundi?
“Dhateng
Kuthagara Pajang.”
“O,
manawi makaten tasih tebih, watawis kalih dinten malih.”
Angka
Wijaya manthuk.Ora let suwe prahune wis nyedhak pelabuhan lan siji mbaka siji
penumpange padha mudhun saka kapal. Semono uga Raden Angka Wijaya lan bature
loro. Pranyata Pelabuhan Demak rame banget. Akeh para saudagar sing padha mlebu
metu pelabuahan. Ana sing arep menyang Surabaya nggawa dagangane, ana sing arep
menyang Banten utawa menyang papan liya ing nuswantara.
Mung
kabare wae ora ana sing padha wani menyang selat Malaka amarga saiki dijeki
wong Portugis.
Pangeran
Angka Wijaya ngulati akeh rawa-rawa kang adoh saka sakiwa tengene kali.
Sawetara kuwi kaline uga jembar satemah kapal-kapal bisa mlebu metu kanthi
kepenak.
“Kenging
menapa lepen menika wiyar sanget, ewasemanten kathah rawa-rawa ingkang ugi
wiyar.?”Pitakone Angka Wijaya marang sawijining saudagar sing lagi lungguh ana
pinggir pelabuhan.
“O,
Ketingalipun, Tuan-Tuan sanes piyayi mriki nggih?” Wong kuwi malah genti takon.
“Pancen
leres, kula saking tatar kilen.”
“O,
saking Cirebon?”
“Mboten.
Saking Sumedhanglarang.”
“O,
ngaten?”
“Kenging
menapa mriki lepene wiyar-wiyar. Sawetawis mrika kathah rawa-rawa ingkang ugi
wiyar?”
“Puluhan
tahun kepengker malah lepen menika langkung wiyar malih. Lan malah rawa-rawa
menika kala emben perangan saking lepen menika.Satemah langkung kathah malih
kapa-kapal ingkang saged mlebet ngriki.”
“Menawi
ngaten kala emben mriki menika seganten?”
“Leres.Daratan
sasampunipun rawa menika rak mujudaken pulo ingkang winastan pulo Muria.
“O,
ngaten”
“Lajeng
lepen menika kala emben perangan saking seganten alit ingkang misahake Pulo
muria kaliyan pulo Jawa. Tiyang-tiyang mastani Selat Muria.”
“Lha
kenging menapa samenika dados lepen?”
“O,
inggih amargi laut menika kenging lemi saking dharatan , dangu-dangu dados
cethek lan wusananipun dados daratan.”
“O,
inggih sampun cetha kula.”
“Sedasa
tahun kepengker Demak menika mujudaken kutha pelabuhan ingkang mapan wonten ing
Selat Muria.Samenika namung wonten pinggiring lepen Tuntang . Mbok bilih
puluhan tahun malih lepen menika badhe dados lepen limrah kemawon.”
“Matur
nuwun,nyuwun pangapunten singten asmanipun,Pak?” Pitakone Angka Wijaya.
”Sebat
mawon Ki Tanu, lajeng dika sinten?”
”Kula
Angka Wijaya, lan menika paman kula.”
“Lha niku wonten kapal ingkang badhe dhateng
ngrika.”
“O,
matur nuwun awit pitulunganipun, Ki Tanu.”
“Sami-sami.”
Dheweke
terus padha pepisahan, Angka Wijaya karo pengawale loro tumuju menyang kapal
sing bakal budhal menyang hulu. Enere menyang kutha Demak lan sakbanjure bakal
tumuju menyang Kuthagara Ing Pajang.
2.Meguru Ing Pajang
U
|
dakara rong dina
sawengine wektu kanggo lakuning Kapal layar saka Demak nganti tekan Pajang.
Pajang mapan ana ing sawetane Gunung Merapi. Ingkang minangka Panguwasa Kraton
Pajang ora liya Sultan Hadi Wijaya. Ingkang ngesahake minangka Raja nalika
samana Sunan Giri, Sunan Giri kuwi sawijining wali sanga. Kanthi cepet jumenengane
Sultan Hadi Wijaya oleh pengakune saka
sakabehing adipati ing wewengkon Jawa Tengah lan Jawa Wetan. Sawetara kuwi
Demak kadadekake sawijining Kadipaten kanthi adipati Arya Pangiri, Putrane
Pangeran Prawoto, ya mantune Sultan Hadi Wijaya dhewe.
Kutha
Pajang pranyata ora kalah gedhene karo Kutha Demak, lan luwih gedhe katimbang
Kuthamaya. Kawulane cukup akeh. Dagang layare rame banget, kuthagarane mapan
ing panggonan sing jembar kanthi pager tembok sing bakoh ngubengi saindhenging
kuthagara.
Kraton
diperang dadi pirang-pirang perangan, Perangan sepisan Kedhaton, Sangarepe ana
sasana sumewa. Satengene ana sasana kaputren lan ing sisih kiwane ana sasana
kaputran. Ya ing kono kuwi cumondhoke para putra raja lan sentananing Ratu.
Nalika
Pangeran Angka Wijaya tekan ing Kutha Pajang ,age-age dheweke lan pengawale
loro padha sowan Sultan Hadi Wijaya ing sasana Sumewa . Sawijing Prajurit jaga
ngeterake tamune telu saka Sumedhanglarang kuwi. Nalika samana Sang Prabu lagi
nampa pisowane para tamu saka tlatah liya. Bareng Prajurit mau matur manawa
tamune kuwi saka Sumedhanglarang,panjenenagane age-age paring sasmita supaya
tamune kuwi mau enggal diaturi sowan.
“Tuan-tuan
begja kemayangan, pikantuk kepareng Dalem supados enggal sowan.”Ature Prajurit
mau.”Mangga Tuan-Tuan, Sang Prabu nengga panjenengan sadaya.”
“Matur
nuwun paman,” Ature Raden Angka Wijaya karo mlaku menyang sasana sumewa.
Angka
Wijaya sabanjure mlebu menyang sasana sumewa sing apik banget lan bawera.Katon
ing tengah-tengah ana kursi pinangka palenggahane ratu. Ing kono Sultan Hadi
Wijaya lenggah kaadhep para nayaka lan para tamu saka manca.
Nalika
Raden Angka Wijaya lungguh ana sawurine para nayaka, Sang Prabu sung sasmita
supaya tamune telu mau sowan rada cedhak panjenengane.
“Sugeng
rawuh, para sedulur saka Sumedhanglarang” Ngendikane Sang Prabu menyang para
tamu saka Sumedhanglarang.
“Wilujeng,
Sinuwun.” Wangsulane para tamu bareng.
“Piye
pawartane Ki Gedheng Sumedhanglarang.?”
“Pangestu
Dalem, Sinuwun. Rama ing Sumedhanglarang
manggih yuwana.”Wangsulane Angka Wijaya kebah subasita.
“Apa
sira ngasta warta saka panjenengane?”
“Kasinggihan
Sinuwun, Kawula ngasta nawala saking Rama.”
“Lamun
mangkono caosna kintaka kuwi. Ingsun kepareng pirsa wosing nawala.”
Sabanjure
kanthi kebak kurmat Raden Angka Wijaya ngaturake nawala kuwi marang Sang Prabu
Sultan Hadi Wijaya.
Layang
sabanjure dibukak dening Sang Prabu. Layang kuwi digawe saka walulang wedhus
sing ditipisake. Ana cap kraton Sumedhanglarang ing sandhuwure.Sultan Hadi
Wijaya wiwit maca.
|
Katur Ingkang Minulya
Sri Sultan Hadi Wijaya
Panguwasa Kraton Pajang.
Kula nuwun,
Ingkang minulya Sri Sultan Hadiwijaya,
kula panguwasa Sumedhanglarang, keparengna kula nitipaken anak kula supados kaparingan
piwucal ngengingi kanuragan , kapamarentahan saha kawruh agami Islam. Supados
anak kula ingkang nami Angka Wijaya menika, mbenjang saged nggantos kalenggahan
kula manawi sampun dumugi wekdalipun.
Awit kepareng Dalem ingkang minulya, kula sarta sadaya kawula
Sumedhanglarang ngaturaken agunging panuwun. Mugi Gusti Ingkang Maha Agung
kepareng paring piwales ingkang matikel-tikel.
Nuwun.
Kurmat kula
Ki Gedheng Sumedhanglarang
Panguwasa Sumedhanglarang.
Katon
pasuryane Sang Prabu sumunar bingar. Panyuwunan kang kaya mangkono dudu kang
sepisanan. Pirang-pirang dina kepungkur buyute Sunan Gunung Jati, Pangeran Emas
uga nate meguru menyang Pajang.
Lan
uga putra-putra Pangeran Sampang, saka
Madura ngentun Putri Harisbaya lan Raden Suryaningrat.
Perkara
iki ora apa-apa tumrap Panguwasa Pajang, amarga kanthi mulang muruk marang
putra-putra raja kuwi ateges nyusun kekuwatan kanggo nyengkuyung Pajang.
Besuk
lamun para putra-putri kuwi wis jumeneng ratu ing kratone dhewe-dhewe. Dheweke
bakal kelingan karo wulangane biyen. Lan kanthi
mengkono gawe rasa ngajeni marang Sri Sultan Hadi Wijaya.
“Praptamu
Ing Bumi Pajang, Ingsun tampa kanthi gambira.”
“Sembah
nuwun ,Sinuwun.”
“Ingsun
dhawuhaken dhumateng Paman Patih
Wanakerti, supados ngladosi para tamu saking Sumedhanglarang menika.”
“Sendika,
Sinuwun.”Wangsulane Patih Wanakerti terus ngaturi tamune telu mau menyang
sasana Kaputran.
Sawise
tekan sasana Kaputran Raden Angka Wijaya ditepungake marang Gurune cacah telu.
“Pangeran
Angka Wijaya, mangga kula tepangaken kaliyan para dwija ingkang badhe paring
piwucal dhumateng panjenengan.”
“Sendika,
Eyang Patih.”
“Ingkang
sepisan menika Kyai Sepuh, ingkang badhe mucal ngengingi kawruh agami Islam.
Kaping kalih Senapati Liman Seta, ingkang badhe nggegulang ngengingi kanuragan
tuwin kaprajuritan.
“Inggih
Eyang Patih.”
“Lajeng
kaping tiga menika, Jeksa Pepitu ingkang badhe memulang ngengingi pamarentahan
lan pengadilan.
“Sembah
nuwun, Eyang Patih Wanakerti.”
“Ing
mriki mangke panjenenagan badhe makempal kaliyan para putra Raja saha pengageng
kraton saking nagri sanes.”
Sawise
kuwi Patih Wanakerti ninggalake sasana Kaputran. Bali menyang sasana sumewa. Lan
sabanjure tamu telu kuwi diaturi menyang bangsale para taruna. Lan wiwit dina
kuwi wong telu kuwi terus diwulang sakehing ngilmu.
Ing
sajrone Bangsal pamulangan, Angka Wijaya tetepungan karo Pangeran
Suryaningrat,putra Adipati Sampang Madura.Dheweke sawijining pangeran gagah lan
jujur sing ora nate dora.
Suryaningrat
lagi sesasi ana ing sasana kaputran. Bebarengan karo dheweke ana saperangan
putra para adipati lan penggedhe liyane. Ana sing saka Kadipaten
Tuban,Kadipaten Madiun,Kadipaten Pathi malah ana uga sing saka Banten lan
Cirebon.
Kyai
sepuh mulang para taruna kuwi kanthi temata. Saben taruna kudu bisa maca lan
nulis aksara arab.kudu apal Alquran, saora-orane 8 Juz. Perangan Aqidah
ngandhakake ngenani kuwajibane sawijining wong Islam sing magepokan karo kawruh
agama. Uga pengandele wong Muslim marang Agama. Perangan syariah ngandharake
kepiye sawijining wong Muslim padha nindakake pangibadah sing temata kaya dene
shalat, zakat ,pasa lan liya –liyane.
Sawetara
kuwi Senapati Pepitu nggembleng olah kanuragan, kaya dene beladhiri utawa
silat, lan uga kasekten. Gemblengan jasmani lan rokhani, terus ditindakake
satemah besuk manawa dheweke dadi penggedhe , wis ora ngutawatiri maneh dadi pangarsa
sing kendel, trampil, nanging ora umuk.
Piwulang
saka Jeksa Pepitu, ngenani kepiye carane ngatur negara lan pamarentahan. Kepiye
carane nata negara supaya kemakmuran bisa maujud. Kepiye dadi sawijining pangarsa sing jujur lan adil.
Kabeh
piwulang mau ditindakake genti-genten ing saben dinane. Preine mung ing dina
Jumat, lan ing dina kuwi mung mligi kanggo ngundhakake ilmu agama lan
pakartine.
Kanggone
Angka Wijaya, mligine wulangan agama , wis dadi perangane uripe ing Kuthamaya. Kangggo
dheweke piwulang mau dilalap kanthi cepet, satemah dheweke dadi siswa sing
pinunjul ing babagan kawruh agama.
Kanggo
wulangan beladhiri lan tata negara, Angka Wijaya isih kudu akeh sinau. Perkara
iki bisa dingerteni dening para dwijane. Nganti tekan sawijining wektu kudu
diadhepake karo praktek langsung ing lapangan.
Sawijining
dina, Angka Wijaya, nindakake ayahan naliti kahanan desa ing lerenging Gunung
Merapi. Amarga sawijining perkara raden Angka wijaya pisah karo Suryaningrat.
Angka Wijaya dumadakan wis tekan ing Desa Jatinom.
Nalika
kuwi mangsane ketiga , arang udan. Angka Wijaya ngulati ing desa sing katon
gersang. Pring-pring wis padha gogrok godhonge katon kuning. Suket lan
alang-alang wis padha garing. Malah nalika ngliwati sawijining kali, banyune
wis wiwit asat.
Angin
midit saka arah wetan, lan lebu-lebu padha mabur tekan dhuwur payon omah.
Wusanane gendhenge katon reget werna abu-abu.
Nalika
kuwi Angka Wijaya sing nyamur laku dadi Panglembara, mlebu ing punjering Desa
Jatinom. Begja wae dalan kuwi wis ditatani krikil. Sawetara kuwi ing sakiwa
tengene dalan akeh wit-witan sing padha alum.
Saka
kadohan dheweke weruh sawijining jejaka sing nganggo sarwa ireng. Jejaka kuwi
sajake uga sawijining panglebara kaya dheweke, katitik dheweke uga nggawa
wungkusan sarung ing pundhake.
Saka
dhuwur katon ana bocah angon sing
mlayu-mlayu meh wae nabrak Angka Wijaya. “ He mandhek dhisik, ngapa kowe
mlayu-mlayu?”
“Kana
ana perampokan.”Omongane bocah angon kuwi karo arep mlayu mlebu tengah desa.
“Perampokan?
Awan-awan kaya ngene? Nekad tenan rampok kuwi.” Kandhane Angka Wijaya sajak
gumun.
“Iya,
grombolan Gagak Ireng nyerbu desa kene.” Kandhane bocah angon kuwi karo wedi.
“Apa
wae sing dijarah?”
“Dheweke
wis njarah bandhane warga, malah ana sing dianiaya lan dipilara.”
“Kurang
ajar, kendel tenan dheweke, kamangka papan iki ora adoh saka Pajang. O, Iya
dhik. Aku bakal ngewangi warga kene ngusir dheweke.”
|
Bocah
angon kuwi meh ora ngandel karo omongane Angka Wijaya.”Nanging.... sampeyan rak
ijen, ta?”
“Percaya
wae mengko ana kancaku sing teka mrene.”
Sabanjure
Angka Wijaya terus ninggalake bocah kuwi tumuju menyang tengahing desa sumusul
nom-noman sing nganggo sarwa ireng mau.
Pancen
nom-noman kuwi wis tekan tengah desa. Dheweke ngulati para perampok padha
njarah bandha donyane warga .
Nom-noman
kuwi weruh sawijining rampok sing nggedhor lawang sawijining omah sing tutupan.
“ He, pasrahna bandha donyamu! Apa omahmu dak obong!”
Katon
lawange menga, sajake sing metu wong tuwa lanang. Rampoke terus nyekel lan
nglarak sing duwe omah kuwi.
“He,
Pak Tuwa, pasrahke bondha donyamu sing aji.!”
“Adhuh
den. Kula mboten gadhah barang sing aji. Namung pantun sekedhik kalih jagung.”
“Ya,
yen ora duwe apa-apa. Jagunge karo parine gawa mrene!”
“Nanging,
Den. Kula nedha napa? Niki nembe paceklik”
“Ora
urusan. Endi Jagung lan parimu?”
“Ampun,
Den.”
“Dak
ajar kowe Pak Tuwa.”
Nalika
kuwi dumadakan sawijining pukulan ngantem gegere. Perampok kuwi gluyuran lan
nguculi pithingane marang wong tuwa kuwi.Lan nalika noleh dheweke weruh
sawijining nomo-noman menganggo sarwa ireng sing lagi capeng malang kerik.
“Sapa
kowe ? Melu nyampuri urusanku?”
“Urusan
sing endi?” Sindhirane nomo-noman kuwi karo ngguyu.
“Urusan
njupuk pari karo jagung.”
“Apa
jagung lan parine mbahmu piye?”
Perampok
kuwi terus nyerang nomo-noman mau sakrosane. Kanthi endha sethithik. Nom noman
kuwi wis uwal saka anteman. Malah tendhangane sikile kasil ngrubuhake perampok.
Kanca-kancane sing weruh kadadean kuwi age-age
ngroyok nom-noman kuwi. Ngulati kahanan kuwi Angka Wijaya kuwatir manawa
nom-noman kuwi kasoran lan dadi tatu awake.
Nanging
Angka Wijaya kaget maneh, amarga nomo-noman kuwi kanthi trengginas ngendhani
serangane perampok. Malah kadhangkala anteman lan tendhangane bisa ngenani
sirah utawa wetenge perampok. Wusanane sawijining wong sing ngroyok ambruk ora
bisa tangi maneh.
|
Saperangan
perampok liyane melu ngepung nomo-noman kuwi. Angka Wijaya age-age tumandang,
Dheweke melu menyang tengah pabaratan.
Kanti
mangkono tetandhingan ngadhepi perampok tambah kuwat. Saperangan perampok padha
ambruk .
Weruh
kahanan kaya ngono kuwi Gagak Ireng, sing mandhegani dadi ora sabar maneh. Apa
maneh dheweke ngulati manawa andhahane bakal nemahi bilahi. Nalika semana uga ana
wong loro sing jumedhul saka wetan, lan sijine maneh saka lor desa. Wong loro
sing saka wetan Ki Srengga lan Ki Pawang
sing nusul bendarane. Sing siji maneh saka lor desa Pangeran Suryaningrat saka
Pamekasan.
“He
, bakule sega . Mundur! Dak adhepane wae coro loro kuwi.” Bengokane Gagak Ireng
karo nggawa pedhange. Andhahane Gagak Ireng mundur bareng, amarga dheweke
rumangsa kuwalahan ngadhepi nom-noman loro kuwi.
“Apa
kowe, sing jenenge Gagak Ireng?” Pitakone Angka Wijaya sing lagi adhep-adhepan
karo wong sing gawa pedhang.
“Ya,aku
Gagak Ireng, panguwasa lereng wetan Gunung Merapi.”
“Genea
kowe ngrampok desa sing mlarat iki gagak Ireng?” Pitakone nom-noman sing
menganggo sarwa ireng.
“Apa
urusanmu? “
Nom-noman
loro kuwi saiki bebarengan ngadhepi Gagak Ireng sing dumadakan nyerang
dheweke.Nanging sabetane pedhang kuwi bisa diendhani kanthi gampang.
Sawise
pirang-pirang jurus lumaku Gagak Ireng durung bisa ngalahake ,amarga nom-noman
kuwi trengginas. Malah nom-noman kuwi bisa nendhang lan ngantem awake Gagak
Ireng.
Saiki
Gagak Ireng nyerang kanthi sakuwat tenagane. Nom-noman loro kuwi satemah
mlumpat mundur ngedohi Gagak Ireng.
Sabanjure
dheweke padha ngunus gamane dhewe-dhewe. Ngulati kahanan kaya ngono kuwi salah
sijine kancane gagak Ireng nrambul melu nyerang, sing diserang nom-noman sing
nganggo sarwa ireng. Saiki padha oleh mungsuh dhewe-dhewe.Peperangan kuwi
wusanane pecah dadi rong perangan. Angka Wijaya ngadhepi Gagak Ireng dene
nom-noman sing sarwa ireng kuwi ngadhepi Bango Thonthong. Sawetara kuwi wong
telu saka Pajang ngadhepi grombolane Gagak Ireng. Wong telu kuwi Ki Srengga ,
Ki Pawang lan Suryaningrat.
Gagak
Ireng nalika kuwi durung nate ngadhepi mungsuh sing tandhing, mulane kesabarane
saya entek. Kamangka kanggone wong sing lagi perang ora prayoga manawa ora
sabar lan tenang. Amarga nesune Gagak Ireng andadekake dheweke kurang
kawaspadan. Nalika samana Gagak Ireng nyabetake pedhang menyang gulune Angka
Wijaya kanthi nafsu gedhe. Kalodhangan kuwi dimupangatake dening Angka Wijaya.
Age –age dheweke ngendhani ngiwa dibarengi karo sikile nendhang dhadhane Gagak
Ireng sing ora ana tamenge. Gagak Ireng kelaran lan malah dheweke mundur
pirang-pirang jangkah amarga dhadhane kena tendhangane Angka Wijaya. Sanalika
Gagak Ireng ambruk mental mundur.Dene pedhange embuh mencolot menyang ngedi.
Nalika kuwi Angka Wijaya mencolot lan terus numpangake pedhange ana gulune
Gagak Ireng. Gagak Ireng tanpa daya. Pedhange wis ucul saka tangane , dadi wis
ora bisa nglawan maneh. Kapeksa dheweke pasrah.
Bebarengan
kuwi Bango thonthong kasil dikalahake karo nom-noman sing nganggo sarwa ireng
kanthi kasabet pedhang ing sirahe. Sanalika dheweke semaput ambruk depani
bantala.
Warga
desa Jatinom age-age ngewangi ngringkus para perampok kuwi. Nalika dheweke
bakal nyiksa para perampok, Angka Wijaya ngelekake. Kareben para rampok kuwi diadili
ana Pajang wae.
Semono
uga Ki Srengga , Ki Pawang lan Suryaningrat wis kasil ngalahake para grombolan
perampok. Dheweke kabeh padha dibanda lan sing lara diobati.
“Matur
nuwun, awit pambiyantu panjenengan sadaya Ki sanak.” Kandhane lurah desa
Jatinom.”Tanpa pitulungan dika , kula kinten warga Jatinom sampun mboten
kantenan.”
“Sampun
kesangeten ingkang ngalembana Pak Lurah. Menika wau ngepasi kemawon, kula
mampir mriki. Sampun mesthinipun menawi kula kedah tetulung sinten kemawon.”
“Oh,
Inggih matur nuwun.”
“Gandheng
menika sampun cekap,kula sadaya nyuwun pamit. Lan para rampok menika badhe kula
glandhang dhateng Pajang.”
“O,
Inggih mangga . Namung mbok inggiha kepareng kendel rumiyin wonten ngriya
kula.”
“Matur
nuwun,Pak. Nyuwun pangapunten sanes wedal mawon kula sowan Pak Lurah.”
“O,Manawi
mekaten kula namung dherekaken wilujeng tindak.”
Sabanjure
para taruna lan Ki srengga sarta Ki Pawang terus padha pamitan. Mung sing dadi
gumune Angka wijaya, geneya nom-noman sing nganggo sarwa ireng kuwi uga melu rombongan
kuwi.
“He,
kanca. Satemene kowe sapa ta? Kok aku durung tepung?”
Nom-noman
kuwi mung mesem lan ngomong. “Apa perlu?”
“Lho,
mesthi wae. Lha rak wiwit mau awake dhewe ngadhepi gerombolan Gagak Ireng
bebarengan?”
“Kowe
rak Angka Wijaya, saka Sumedhanglarang ,ta?”
“Lho
kok wis ngerti aku? Kamangka durung nate tetepungan.”
“Ya
durung, nanging aku wis ngerti ngenani sampeyan.Lan uga pengawalmu loro
kuwi.Dheweke Ki Srengga karo Ki Pawang ta?”
Angka
wijaya saya tambah bingunge. Suryaningrat mung ngguyu.” Angka Wijaya, ngertiya
kuwi adhiku.”
“Wiwit
kapan ana Pajang?”
“Ya
wiwit aku ana Pajang.”
“Nanging
aku ora nate weruh ana kaputran.”
“Ya
, mesthi wae, amarga panggonane dudu kaputran.”
“Lha
terus?”
“Dheweke
sawijining wanita.”
“Wanita....?”
“Iya,
iki adhikku Putri Harisbaya, sing meguru ana pajang bareng karo aku.”
“Wah
, ora nyana aku perang mau diewangi sawijining wanita. Nyuwun pangapunten
,diajeng Putri Harisbaya.”
“Ora
sah ngono Kang Mas.” Wangsulane Putri Harisbaya sing lagi nyamar kuwi. Praupane
katon semu abang amarga lingsem. Sanajan nyamar nanging tetep katon ayune.
“Saiki enggal ganti wae, Dhiajeng.!” Pakone
Suryaningrat.
“O,
Iya. Kangmas Suryaningrat.Pancen wis wayahe aku ganti sandhangan.”
Sabanjure
nom-noman sarwa ireng kuwi age-age njaluk palilah warga desa supaya disilihi
papan kanggo ganti sandhangan.Ora let suwe dheweke wis manjalma dadi sawijining
wanita sing ayu banget.
Angka
Wijaya ora ngira manawa sing wiwit mau ngewangi dheweke jebul sawijining wanita
sing ayune tumpuk undhung. Atine krasa dhegdhegan, ana rasa aneh sing dumadakan
thukul emboh saka ngendi asale.Dheweke wiwit ngendhem rasa tresna. Rasa ing
antarane sawijining pria marang sawijining wanita. Sabanjure padha mbacutake
anggone meguru ana ing Pajang.
3.Kumembenging Waspa
L
|
amun ditonton
saka wektune Raden Angka Wijaya anggone meguru ana ing Pajang wis meh telung
tahun, nanging kanggone dheweke isih kaanggep kurang. Amarga sanajan dheweke
wis nguwasani ilmu agama ,ngilmu pamarentahan lan kanuragan. Ewasemono dheweke isih kepengin ngundhakake ngilmu
kadigdayan.
Lan
manehe dheweke saiki wis nemokake wanita sing dadi katresnane . Mulane dheweke
ana Pajang saya krasan atine.Semono uga Putri Harisbaya uga nrisnani Angka
Wijaya.
Ing
Sawijining dina, nalika manuk-manuk padha ngoceh ing panging uwit .Katon ana
wong loro padha leren sawise gladhen ngilmu kanuragan. Wong loro kuwi ora liya
Angka Wijaya lan Putri Harisbaya sing ngagem cara priya.
Ya
mung ing kalodhangan kaya ngono kuwi dheweke bisa sapatemon. Amarga sawise bali
menyang bangsale dhewe-dhewe , dheweke ora oleh padha sapatemon.
“Delengen
manuk-manuk ing sandhuwuring uwit kuwi, Kang Mas! Kandhane Putri Harisbaya.
“Ya
aku uga ngulati,Dhi Ajeng.”
“Kapan
awake dhewe bisa kaya dheweke?”
“Ya,
mesthi wae sawise palakrama.”
“Kapan
kira-kira kuwi bisa ditindakake?”
“Ya
sawise aku dadi Raja ing Sumedhanglarang,Dhi Ajeng.”
“Tenane
lho ,Kang Mas? Apa wis kanthi gumolonging tekad?”
|
“Ya mesthi ta Dhi Ajeng. Sabar dhisik ngenteni
wektune.”
Bareng
Putri Harisbaya krungu Angka Wijaya janji kaya mangkono, dheweke terus netesake
waspa. Dheweke trenyuh banget.
Durung
sawetara suwe anggone padha jagongan dumadakan Ki Srengga lan Ki Pawang aweh
sasmita supaya dheweke enggal bali menyang bangsale dhewe-dhewe.
“Awake
dhewe pisah dhisik. Dhi Ajeng. Wis wektune bali menyang bangsale dhewe-dhewe.”
“Ya,
Kang Mas. Saka pangrasaku lagi sadhela sapatemon iki mau.” Putri Harisbaya
katon kuciwa.
“Sabara
nganti wektu sing dienteni kuwi teka, Dhi Ajeng!” Angka Wijaya aweh panglipur.
Dina
esuk candhake Angka Wijaya ,Ki Srengga lan Ki Pawang katimbalan dening kyai
Sepuh. Wong telu terus padha ngadhep.
“Kula
nuwun,Kyai Guru.”
“Mangga,
Nak Mas ,Ki Srengga lan Ki Pawang.”
“Nyuwun
pangapunten Kyai Guru. Wonten dhawuh menapa?”
“Matur
nuwun, sampeyan kabeh enggal padha mrene. Wruhanira Iki ana nawala saka
Sumedhanglarang. Yen dak pirsani saka tandha-tandhane iki saka Kedhaton
Kuthamaya. Lha iki nawalane, wacanen kanthi ati kang wening!”
Kyai
sepuh sabanjure ngulungake gulungan nawala sing digawe saka kulit wedhus kuwi
menyang Angka Wijaya. Kanthi rasa gemeter Angka Wijaya nampani kintaka kuwi.
Alon-alon nawala kuwi dibukak. Katon ana sisih dhuwur ana cap kraton
Sumedhanglarang. Angka Wijaya wis bisa mesthekake manawa layang kuwi digawe
saka Ramane, Ki Gedheng Sumedhanglarang.
Kanggo
Putraningsun Angka Wijaya
Ing Pajang.
Kanthi kebaking katresnan,
Putraningsun Angka Wijaya, abot
rasaningsun nulis kintaka iki. Ramanira ya ingsun wektu iki lagi nampa cobaning
Gusti Kang Maha Kuwasa. Wus meh sawarsa iki Ramanira nandhang raga.
Ingsun pengin paring dhawuh sing akeh
tumrap jeneng sira. Saka pangrasaningsun akeh perkara sing kudu sira tindakake,
manawa sawanci-wanci Ingsun kapundhut Gusti Kang Akarya Gesang.
Mula saka kuwi, kondura dhisik menyang
Sumedhanglarang karo punakawanira sakarone. Muga-muga Ingsun isih bisa nunggu
praptanira.
Cukup semene dhawuh Ingsun, muga Gusti
tansah memayungi sira kabeh ing Pajang.
Ramanira
Ki Gedheng Sumedhang.
Angka
Wijaya sawise maca layang kuwi dadi pucet raine, cetha kaya ngapa susahing ati
oleh warta sing kurang becik kuwi.
Dheweke
ngulati Kyai Sepuh kanthi sedhih, lan terus nyawang marang punakawane loro.
“Ana
kadadean apa Nak Mas?”Pitakone Kyai Sepuh.
“Leres,
Pangeran. Wonten pawartos menapa?” Ki Srengga takon.
“Nawala
saking Rama Prabu, lan sakintenipun nembe gerah ingkang awrat. Panejenganipun
nimbali kula sadaya kedah wangsul dhateng Sumedhanglarang.”
“O,...”
Kandhane ki Srengga lan Ki Pawang meh bebarengan.
“Ya
, yen kaya mangkono kudu kundur, Nak Mas. Manawa bisa sacepete, mbok manawa iki
dina-dina sing pungkasan tumrap Panjenengane. Mula kuwi, sampeyan kabeh wong
telu kudu enggal age tata-tata kundur menyang Sumedhanglarang.”
|
“Awit palilah Kyai guru, kula matur nuwun
sanget.”
“Uwis
Nak Mas. Enggal kundura, mundhak kentekan wektu!”
Sawise
kuwi wong telu terus padha ninggalake bangsal pamulangan kawruh agama lan
age-age tata-tata sacukupe.
Angka
Wijaya uga ora lali nulis layang kanggo Putri Harisbaya lan dititipake karo
Kangmase, Pangeran Suryaningrat.
“Tulung
Raden Suryaningrat, wenehna layangku iki menyang Dhi Ajengmu Putri Harisbaya.
Kandhakna ,kanthi nalangsa banget aku ora bisa nemoni amarga wektune rupek.
Kandhakna marang dheweke muga-muga awake dhewe bisa ketemu maneh.”
“Ya
mesthi, Raden Angka Wijaya. Muga-muga awake dhewe bisa ketemu maneh.”
Sabanjure
wong loro kuwi padha rerangkulan.
“Muga-muga
Ramamu bisa mari maneh.”
Kanthi
alon Aknga Wijaya nguculi rangkulane mau lan kanthi alon dheweke dheweke terus
ninggalake sasana Kaputran. Ing jaba ana kudha cacah telu sing gagah, sing
bakal ngeterake tekan pelabuhan.
Ganti
kang cinarita ora kaya kang ana ing Kedhaton kuthamaya. Nalika samana kedhaton
kebak rasa kaprihatinan. Wis meh setahun Ki Gedheng Sumedhanglarang nandhang
raga. Kanggo sawetara wektu panguwasa diasta maneh dening Sang Prameswari kang tumindak
minangka Pucuk Umum Sumedhanglarang.
Wektu
iki kahanane Sang Parbu saya gawat. Malah panjenengane wis ora bisa tangi saka
pagulingane.
Wis
akeh tabib saka saindhenging nagara dilumpukake , parandene durung bisa
maluyakake Sang Prabu. Ana ing swasana sing saya mrihatinake kuwi Sang Prabu
ngersakake nulis nawala kanggo Putrane sing lagi meguru ing Pajang supaya
enggal bali.
Pirang-pirang
sasi sadurunge gerah panjenengane wis miyarsa manawa Kraton Pajajaran wis
ambruk dening serangan gedhen-gedhen saka Kraton Islam ing Banten. Malah raja
pungkasan ing Pajajaran Prabu Surya Kencana wis gugur mbelani negara.
Sadurunge
kadadean kuwi, para penggedhe Pajajaran sing dipangarsani Eyang Jaya Prakosa
uwis ngungsi menyang Sumedhanglarang karo ngasta makutha Kraton lan tadha
keagungan kraton Pajajaran. Eyang Jaya Prakosa dhek biyene sawijining senapati
Pajajaran. Nanging ngulati kahanan sing ora ngepenakake dheweke pilih ngungsi
menyang ngetan. Dene Ragamulya Surya Kencana
mindhakake kuthagara menyang Pulosari, Banten.Panjenengane minangka Raja
pungkasan Pejajaran sing ora ngagem makutha. Jaya Prakosa dikancani adhi-adhine
kayata Wiradijaya utawa kaprah sinebut Eyang Nanganan utawa Eyang Bathara
Wiyati Wiradijaya, Kondhang Hapa utawa Sang Hyang Hapa, lan Pancar Buwana utawa
Eyang Bathara Pancar Buwana utawa Eyang Terong Peot.
Penggedhe
Pajajaran cacah papat kuwi ditampa dening Ki Gedheng Sumedhanglarang kanthi
becik.
Malah
wong papat iki terus mlebu menyang agama Islam. Mesthi wae perkara iki gawe
senenge Ki Gedheng Sumedhanglarang.
Dheweke padha mrayogakake supaya
Sumedhanglarang ngadek dhewe, aja kebawah ing Kraton Cirebon. Kepiye wae dhek
emben Sumedhnglarang kuwi mujudake perangan saka Kraton Pajajaran. Lan saiki
luwih becik nguwasani wewengkon Pejajaran ing sisih wetan.
Nanging
nalika wong papat kuwi lagi nglumpukake kekuwatan kanggo nindakake gegayuhan
kasebut, kanthi dumadakan Sang Prabu wiwit nandhang lara-laranen. Lan saya suwe
larane saya santer. Yakuwi sababe Sang Prabu age-age nglayangi Putrane.
Jaya
Prakosa wis diangkat pinangka Senopati, dene rancangan nglumpukake kekuwatan
durung komplit.
Miturut
Jaya Prakosa wewengkon tilas sing dikuwasani Pajajaran, mligine ing sisih wetan
kali Ciliwung, prayogane dikuwasani dening Sumedhanglarang. Wewengkon kuwi
tilas Kraton Galuh nganti saperangan tlatah Tatar Wetan perangan kidul.
Senapati jaya Prakosa isih kelingan, nalika dheweke sakanca padha ngungsi tekan
Kuthamaya. Panampane Ki Gedheng Sumedhanglarang lan Prameswarine gawe senenge
atine. Dheweke ditampa kanthi kebak urmat lan paseduluran. Nganti Jaya Prakosa
kandha, ‘Dhuh Sang Prabu Ki Gedheng Sumedhanglarang. Kula kabeh masrahake jiwa
ragaku kangga negara Sumedhanglarang.’
‘Kula
sadaya nyuwun pangapunten, amargi damel repot ing ngriki, ugi pisowan kula
kanthi dumadakan tanpa cecala rumiyin.
‘Kula
sadaya ngrumaosi lepat lan nyuwun pangapunten . Kula gadhah pepenginan
kuncarane Pajajaran ing duking nguni saged dipun lajengaken dening
Sumedhanglarang. Pramila kula mbeta makutha lan tandha-tandha keagungan kraton
Pajajaran. Lan manawi sampun dumugi wekdalipun badhe kula atuaken panjenengan
Dalem.’
‘Kadang-kadang
kula saking Pajajaran,’Ki Gedheng Sumedhang ngetokake pangunek-uneke,’Sampun
tidha-tidha kaliyan pamarentahan ing ngriki. Pancen negara ngriki agengipun
mboten kados Karaton Pajajaran duking nguni, ewasemanaten kula tetep ngayomi
panjenenagan kabeh, saking panguyake sinten mawon. Kula suwun tenang an akene.
Perkara makutha Pajajaran lan tandha-tandha keagungan Kraton Pajajaran prayoga
disimpen wae bebarengan ana kene. Minagka pepeling marang sujarah duking
nguni.’
‘Matur
nuwun Sang Prabu, sadhela maneh Pajajaran bakal sirna, nanging aku pengin
kuncarane diterusake ing Kuthamaya kene.’
‘Mugi-mugi
Eyang Jaya Prakosa. Nanung kemawon mbok bilih jamanipun sampun benten. Agami
lan kapitadosan kala emben sampun dipun gantos kanthi agami lan kapitadosan
ingkang enggal, inggih menika agami Islam, agami ingkang pungkasan ing donya
menika.Keagungan Pajajaran ingkang dipun semangati mawi ajaran Hindhu mokal
dipun tangekaken malih, nanging manawi Pajajaran ingkang inggal dipun semangati
mawi ajaran Islam.’
‘Aku
para pengungsi padha nayogyani tekad Paduka Sang Prabu.’Wangsulane jaya Prakosa lirih.
Gelem
ora gelem para pengungsi saka pajajaran padha manut marang karsane Sang Prabu
Ki Gedheng Sumedhang. Ing dina kuwi uga para pengungsi padha ikrar mlebu agama
Islam. Ikrar dituntun dening Ki Gedheng Sumedhanglarang, kanthi mangikono Sng
Sang Prabu ora tidha-tidha maneh nampa para pengungsi kuwi.
Sabanjure
Senapati Jaya Prakosa wiwit nyusun kekuwatan kanggo gawe pertahanan ing
Sumedhanglarang.
Nalika
wancine udan riwis-riwis ing Kuthamaya, jumedhul pawongan nitih kudha cacah
telu saka sisih wetan. Dheweke padha katon lungkranh sawise mlaku adoh.
Mendhung isih nggenteyong ing sandhuwuring Kuthagara kuthamaya nalika dheweke
padha mlebu ing gapuraning Kraton Kuthamaya.
Prajurit
jaga cacah loro sing bakal ngendhekake lakune wong telu kuwi ora sida amarga
ora pangling manawa sing teka kuwi Pangeran Anom Angka Wijaya sing kondur saka
Pajang.
“Mangga
Kanjeng Pangeran.” Ature salah sijine prajurit jaga.
“Matur
nuwun.” Wangsulane Angka Wijaya karo nitih kudha mlebu alun-alun Kraton.Ing
pagedhokan dheweke menehake jarane marang punakawane loro Ki Srengga lan Ki
Pawang.
“Openana
kanthi becik Paman.”
“Sendika
Pangeran.” Wangsulane ki Srengga lan Ki Pawang.
Sateruse
Angka Wijaya bwiwit munggah ana tlundhakane tumuju menyang Kedhaton. Dumadakan
wong sing durung ditepungi nyegat. Pawongan kuwi nganggo sandhangan senapati.
“Mangga
pangeran.” Kandhane Senapati gedhe dhuwur kuwi.
“Nyuwun
pangapunten, Panjenengan sinten nggih?”
“Kula
Jaya Prakosa, Senapati Sumedhanglarang sing enggal.”
“O,
nyuwun pangapunten, kula nembe mangertos.”
“Sampun
dipun tengga Sang Prabu Pangeran.”
“Inggih,
Sang Senapati. Samenika Rama wonten pundi?”
“Wonten
ing bangsal pagulingan, Raden.”
“Matur
nuwun.”
“Mangga
kula dherekaken.”
Wong
loro kuwi age-age tumuju menyang bangsal
pagulingan. Sajak kesusu dheweke tekan ing papan kuwi. Ing Papan sing jembar kuwi Sang Prabu Ki Gedheng
Sumedhanglarang gumlethak tanpa daya. Sang Prameswari lungguh ana ing sisih
tengene.
“Kula
ingkang sowan Kanjeng Rama.”Ature Angka Wijaya.
“Iya
ngger Putraku Angka Wijaya.”Wangsulane Dewi Satyasih.
Alon-alon
netrane Sang Prabu melek. Katon sumunar netrane bareng weruh putyrane sing
diarep-arep wis teka. Astane kumlawe alon ngranggeh arsa ngrangkul Angka
Wijaya.
Pangeran
Angka Wijaya age-age ngambung astane ingkang Rama. Sawetara kuwi Senapati Jaya prakosa
njaga ana sajabaning bangsal pagulingan.
“Kula
sampun sowan,Rama.”
“Iya
ngger, Ana sing bakal dak dhawuhake.”
“Sampun
Rama, mboten menggalih perkawis sanes,kula suwun nggatosaken kasarasanipun Rama
langkung rumiyin.”
“Ora
,Putraku sajake wus tumekaning mangsa kala pisowanku ing ngarsaning Gusti Kang
Maha Kuwasa.”
“Rama
sampun ngantos ngendika mekaten. Kula nyuwun Panjenengan Dalem inggal saras
tuwin ngasta panguwaos malih.”
“Kuwi
mokal Ngger.Ragaku wis ora kuwat, lan pengin paring dhawuh cekak wae.”
“Wonten
Dhawuh punapa Rama?”
“Seksenana,Dhi
Ajeng Prameswari!”
“Sendika
Sinuwun.”Wangsulane Prameswari.
”Seksenana
uga, Senapati jaya Prakosa!”
|
“Sendika, Sinuwun.” Wangsulane Jaya Prakosa
saka kadohan.
“Aku
wis ora kuwat maneh. Mula kuwi sapungkur ingsun mengko, Dhampar keprabon Ingsun
pasrahake marang Angka Wijaya. Paman Jaya Prakosa lan kadangira kabeh tetepa
nyengkuyung Kraton Sumedhang larang.”
”Kawula
sadaya nyekseni Kanjeng Sinuwun.”
“Matur nuwun.” Pengendikane Sang Prabu alon.
Sabanjure
Sang Prabu meneng sawetara, lan banjur ngandika.
”Putraningsun
Angka Wijaya.Dadiya pangarsa sing setya ing Janji. Aja mbalenjani sapa wae.
Tresnana kawulanira lan tumindaka sing adil, jejekna agama kanthi
sabecik-becike, muga-muga uripira tansah manggih yuwana awit berkahing Gusti.”
Sawise
Sang prabu ngandika mangkono katon menggeh-menggeh ilining napas lan nupus
sanalika oncat ponang suksma ragane ngalumpruk pindha kapuk.mustakane nleh
manengen cihna lamun sang prabu wis Mangkat. Sang Prameswari ora kuwat rasa
sedhih satemah jerit-jerit sungkawa ing penggalaih.Semono uga sing padha sowan
dadi sanalika papan pagulingan kuwi udan tangis.
Kanthi
cepet pawarta ngenani sedane Sang Prabu sumebar sajroning kuthagara kuthamaya.
Malah sumebar saindhenging nagara Sumedhanglarang.Lan keprungu tekan Cirebon, Banten
lan Pajang.
Sawise
layone Sang Prabu rinukti nut satataning praja, daya-daya budhal kasarekake ing
sasana laya Dayeuhluhur,
Swasana
dhuhkita warata datanpa sela ing saindhenging nagara Sumedhanglarang. Para
kawula rumangsa kelangan Panguwasaning negara kang ambek palamarta. Mulane ora
aneh lamun kawula sanegara padha kumembeng ing waspa.
4. Angka Wijaya Winisuda
Y
|
en Kusir andhong
sing mati ninggalake andhonge,Nakodha mati ninggalake kapale dene manawa Ratu
seda ninggalake makuthane. Kaya dene ing Karaton Sumedhanglarang nalika samana.
Sawise patang puluh dina anggone Sang Prabu Ki Gedheng Sumedhanglarang seda.
Kraton Sumedahanglarang ora ana sing lenggah dhampar denta ngagem makutha
kanigara.
|
Pangeran
Angka Wijaya tinimbalan ingkang Ibu prameswari. Dewi Satyasih ingkang pinangka
Pucum Umum sing ateges gumanti Ratu mung sawetara mangsa.
“Putraku ngger Angka Wijaya” Ngendikane sang
Prameswari marang Angka Wijaya.”Awake dhewe kabeh wis padha krungu sabdane
Ingkang Rama ya Sang Prabu Ki Gedheng Sumedhanglarang ingkang pungkasan.
Nanging miturut paugeraning praja Sumedhanglarang sawijining Nalendra yuswane kudu
wis 23 tahun. Sawetara kuwi sira lagi umur 22 tahun. Mula saka kuwi Jumenengmu
minangka Raja Sumedhanglarang bakal ditindakake ing warsa ngarep sawise yuswa
23 tahun.”
“Inggih
Kangjeng Ibu, Panci mekaten paugeraning Kraton Sumedhanglarang. Kula namung
dherek mawon miturut pranatan ingkang sampun lumampah.”
“Ya
yen mangkono padha seksenana Paman Senapati Jaya Prakosa lan kabeh wae kang
padha sowan.”
“Kula
nyekseni Kanjeng Ratu.”Ature Jaya Prakosa.
“Kula
inggih nyekseni Kanjeng Ratu.” Ature kang padha sowan.
“Matur
nuwun awit paseksen sira kabeh.Sawetara iki panguwasa Sumedhanglarang kula cepeng
malih.”
“Kasinggihan
Kanjeng Ratu.”Wangsulane kabeh para nayaka.
“Nanging
minangka Raja Anom, Angka Wijaya kudu wiwit ngasta pamarentahan . Dheweke
tumindak minangka Wakil Ratu, idhep-idhep ajar ngurusi punjering pamarentahan.”
“Sendika
Ibu. Kula badhe nyuwun pitedah dhumateng Eyang Jaya Prakosa ingkang sampun
kathah lelabetanipun ing Pajajaran.”
“Bener,
Ngger Angka Wijaya. Iki mujudake kalodhangan tumrap sira kanggo ngudi undhaking
kawruh suoaya dadi panguwasa sing tangguh ing wewengkon kene.”
“Manawi
dipun keparengaken kula badhe mbangsuli atur kula nalika Sinuwun Prabu tasih
sugeng.” Senapati Jaya Prakosa mbukak gagasane kang wus kepungkur.
“Apa
panemunira Paman Jaya Prakosa, mula age aturna?”
“Ngaturi
wuninga Kanjeng Ratu, Nalika semanten kula nembe dumugi ing Kraton Sumedhanglarang ngriki, Kula sadaya
sami prasetya dhateng Kraton Sumedhanglarang kaliyan Sang Prabu. Prasetya kula
badhe kula buktekaken kanthi kalih perkawis. Sepisan kula badhe ngiyataken
pertahanan lan katentremaning Kraton Sumedhanglarang.”
“Iya
Paman.Aku midhanget perkara kuwi.Sabanjure?”
“Kaping
kalih, kula badhe mbangsulaken jayaning Kraton Pajajaran duking nguni.”
“Lha
terus carane pripun, Paman?”
“Kula
badhe damel prajurit ingkang kathah lan
jadhon-jadhon minangka beteng ingkang bakoh. Salejengipun badhe nguwaosi tilas
wewengkon Galuh ingkang wonten ing Tatar
Parahyangan kados ta Bandhung, Garut, Tasik Malaya lan Ciamis.
Katambah
tilas wewengkon Pajajaran mliginipun ing sisih wetan lepen Cisadane ingkang
samenika mboten gadhah Raja.”
“Lho
saiki rak dikuwasani Banten lan Cirebon, ta Paman?”
“Inggih
menika sababipun, Kanjeng Ratu. Prajurit kedah dipun kiati langkung rumiyin.Manawi
sampun siaga nembe tumindak. Lha mangke saupami Cirebon cawe-cawe, inggih sisan
dipun adhepi. Ngiras pantes awake piyambak saged uwal saking Cirebon ngandek piyambak
dados kraton ingkang mardika.”
“Kuwi
prayoga Paman, nanging kabeh mau kudu dipenggalihake kanthi mateng. Supaya mengko
awake dhewe sora dadi kurban.”
“Mesthi
kemawon, Kanjeng Ratu.Miturut pamanggih kula kekiatan Cirebon sampun ringkih.
Langkung-langkung sasampunipun seda para tokoh-tokohipun.Kadosta Sunan Gunung
Jati tuwin Fathilah Khan. Katamabah malih reresah ing iring wetan.”
“Iya,
ingsun ngerti Paman. Sabanjure ingsun pasrahake marang kawicakcananira lan sarasehna
karo Prabu Anom Angka Wijaya.!”
“Inggih
sembah nuwun,Kanjeng Ratu. Manawi panjenengan sampun mitados kula , mugi mugi
mboten ndadosaken kuciwaning penggalih Dalem.”
Wiwit
dina kuwi Kraton Sumedhanglarang ana owah-owahan. Saben dina mesthi ana tambahan
prajurit anyar lan mesthi ana gladhen perang ing antarane prajurit
Sumedhanglarang sing digembleng dening para tokoh sepuh Pajajaran. Satemah kekuwataning
prajurit Sumedhanglarang saya gawe mirise kraton sacedhake.
Amarga
saka kawasisane Tokoh Pajajaran cacah papat kuwi, mulane wewengkon
Sumedhanglarang wis tambah kanthi perang sing ora sepiroa.
Tambahane
wewengkon wiwit saka ing sisih kulon watese kali Cisadane, sisih elor watese
Cirebon, sisih kidul watese segara
kidul, sisih wetan watese kali Cipamali. Malah saperangan tilas wewengkon
Pajajaran lan Galuh wis bisa dikuwasani Kraton Sumedhanglarang.
Untung
nalika samana Kraton Cirebon kanthi panguwasa Panemban Ratu lagi ringkih
kekuwatane perang. Satemah uwale Sumedhanglarang saka Cirebon ora ana alangan
sing gedhe. Malah 44 panguwasa tilas bawahan Pajajaran padha ngakoni lan ngayom
marang Sumedhanglarang. Kabeh mau awit kawasisane Senapati Jaya prakosa lan adhi-adhine.
Setahun
candhake nalika yuswane Pangeran Angka Wijaya wis genep 23 tahun. Sing ateges
Pangeran Angka Wijaya wis diwenangake dadi Ratu nglenggahi dhampar ing Kraton
Sumedhanglarang.
Ing
sawijining dina pinilih ing Kraton Sumedhanglarang dianakake Wisudan utawa
Jumenengan Ratu.Pangeran Angka Wijaya sinengkakake ing ngaluhur jumeneng
minangka Ratu ing Kraton Sumedhanglarang kanthi jejuluk Prabu Geusan Ulun
Sumedhanglarang. Geusan saka tembung basa sundha sing tegese papan utawa
panggonan. Dene Ulun sing ateges wong sing bisa dijaluki tulung. Dadi Geusan
Ulun ngemu teges Sawijining Raja, panggonane kawula padha nyuwun pitulungan
utawa papan kanggo ngayomi para kawula saka salwiring bebaya.
Sabanjure
Senapati Jaya Prakosa kawisuda minangka Patih. Dene adhi-adhine diangkat dadi
senapati Sumedhanglarang.
Minangka
pepeling jumenengane Prabu Geusan Ulun, Patih Jaya Prakosa nandur Wit Hanjuang
ing alon-alon Kuthamaya. Minangka cihna manawa Sumedhanglarang kuwi mujudake
Pakuan kapindho. Lan Kuthamaya mujudake kutha sing sadrajad karo Kutha Pakuan.
Patih Jaya Prakosa duwe idham-idhaman murih jayaning Sumedhanglarang besuk kaya
dene jayaning Pajajaran duking nguni.
|
Pancen
bener jejuluke Sang Prabu Geusan Ulun, sawijining Ratu sing tansah ngugemi
jejeging adil, tresna banget marang kawulane lan kanthi temen anggone ngurusi negarane.
Panjenengane luwih nggatekake kabutuhane negara lan kawulane katimbang
kabutuhane pribadi. Tuladhane panjenengane rada nglalekake Putri Harisbaya.
Kamangka nalika samana wis nate prasetya lamun wis kawisuda dadi Raja
Sumedhanglarang bakal nglamar putri Harisbaya.
Ganti
kang cinarita ora kaya ing Kraton Pajang. Putri Harisbaya isih ana ing sasana
Kaputren tansah ngantu-antu tekane Pangeran Angka Wijaya sing saiki wis
jumeneng Ratu kanthi jejuluk Prabu Geusan Ulun.
“Genea
nglalekake aku, Kakang Angka Wijaya?” Panggresahe Putri Harisbaya. Wis
matahun-tahun dheweke nunggu nanging pawarta saka Sumedhanglarang wae ora
ana.”Apa wis lali karo janjine?”
Kasungkawaning
penggalih Putri Harisbaya saya suwe saya tambah.Luwih-luwih nalika kahanan
Pajang dadi kaco. Ing wewengkon kang adoh saka Kuthagara, wiwit thukul kraman,
mligine wewengkon Mataram sing wis mbalela.
Perkara
kuwi gawe dukane Sang Prabu Sultan Hadi Wijaya. Age-age dikerikake wadyabala
prajurit Pajang kanggo nggempur negara Mataram. Nanging pepesthene kodrat datan
bisa diwiradat kersaning Gusti datan kena diselaki, Sultan Hadi Wijaya Gugur
ana ing pabaratan. Lan Mataram uwal saka cengkeremane Pajang lan sabanjure ana
sangisore panguwasane Panembahan Senapati.Sawetara kuwi Kraton Pajang sabanjure
diasta karo Pangeran Pangiri saka Demak. Panjenengane kuwi putra mantune Sultan
Pajang. Dene Pangeran Benawa ya putra jalune Sultan Pajang malah ora kepilih
dadi Ratu. Perkara kuwi dadi ora senenge Panembahan Senapati ing Mataram.
Mulane Panembahan Senapati kepengin ngejeki Pajang bakal didadekake bawahane
Mataram.
Weruh
Kahanan sing saya ngutawatiri kuwi, mulane Raja Arya Pangiri nyoba nenarik
atine raja-raja sajabane Pajang. Lan sing dilirik kuwi Cirebon. Nalika samana
Cirebon diasta Pangeran Emas sing Jejuluk Panembahan Ratu. Karepe dheweke
ngiket talining kekadangan supaya besuk yen dumadi perang ing Pajang dheweke gelem ngewangi Pajang. Kanggo
karep kang kaya mangkono mulane Putri Harisbaya diwenehake pinangka bebungah
marang ratu ing Cirebon.
Putri
Harisbaya dhewe, satemene ora seneng manawa dipundhut garwa Panembahan Ratu ing
Cirebon. Amarga dheweke isih ngeteni panglamare Angka Wijaya saka
Sumedhanglarang. Nanging dheweke ora bisa suwala , nalika papagan saka Cirebon
wis teka. Dheweke padha nggawa Kreta Kraton kanggo mapak calon garwane Ratu.
Bareng tekan Cirebon, sanajan kanthi ati sing remuk
lan rempu , Putri Harisbaya wusanane digarwa karo Panembahan Ratu minangka
garwa kaping loro.
Panembahan
Ratu dhewe wis kagungan garwa , Putrane Sultan Hadi Wijaya Pajang sing asmane
Putri Lampok Angroros.
Satemene
Panembahan Ratu dhewe ora seneng karo tekane Putri Harisbaya amarga putri
Harisbaya kuwi minangka bebungah Ratu Pajang. Sing mengku pangajab supaya Panemabahan
Ratu gelem ngewangi Pajang manawa dumadi perang mungsuh Mataram. Kamangka
Panembahan Ratu ora sarujuk karo Ratu Pajang sing saiki, malah dheweke
nyengkuyung Pangeran Benawa sing uga disengkuyung dening Mataram.
Pawarta
ngenani dhaupe Putri Harisbaya lan Panembahan Ratu kuwi uga tekan ing Kraton
Sumedhanglarang. Prabu Geusan Ulun krungu pawarta mau dadi cuwa penggalihe.
Amarga dheweke rumangsa telat anggone nglamar Putri Harisbaya nalika mapan ing Pajang. Nanging apa gunane nggetune
barang sing wis kelakon.
Kuciwane
Prabu Geusan Ulun pranyata ngowahi anggone ngasta pusaraning praja.Mulane ing
sawijining dina nalika Patih Jaya Prakosa lagi ngadhep. Kapeksa Sang Prabu
ngandharake perkarane.
“Wonten
menapa Wayah Prabu sajak sungkawa ing penggalih?” pitakone Patih Jaya Prakosa.
“Mboten
menapa-menapa, Eyang Patih.”
“Nyuwun
pangapunten, Sang Prabu.Kula menika sampun sepuh, dados sampun kathah anggen
kula ngraosaken pahit getiring kawontenan.Pramila kula suwun blaka kemawon.”
“Mboten
Eyang Patih.Kula sae-sae kemawon.”
“Sampun
ngantos dora,Wayah prabu.Ingkang Eyang ngertos liring netra panjenengan mboten
saged nyelaki kula.”
“Dika
leres,Eyang Patih. Sadaya menika lepat kula piyambak.”
“Cobi
dipun andharaken kemawon perkawisipun supados kula saged atur pamrayogi.!”
“Eyang
midhanget, bilih kula nate meguru dhateng Pajang?”
“Inggih
kula mireng cetha.Nalika semanten kula nembe dumugi”
“Nalika
meguru menika kula pinanggih kaliyan satunggaling wanita saking Madura ingkang
sulistiya ing warni.”
“Sinten
asmanipun,Wayah prabu?”
“Piyambakipun
Putri Harisbaya.”
“Lho,
menika rak garwanipun Panembahan Ratu Cirebon igkang enggal menika ta, Wayah
Prabu?”
“Leres,
Eyang Patih.Menapa Eyang pirsa perkawisipun, kenging menapa kanthi dumadakan
dados garwanipun Ratu Cirebon?”
“Manawi
saking kabar ingkang kula tampi saking para saudagar. Amargi Arya Pangiri
gadhah pikajeng sanes.”
“Menapa
pikajengipun,Eyang?”
“Mboten
sanes supadoa Panembahan Ratu kersa paring sabiyantu manawi Pajang pikantuk
serangan saking Mataram.”
“Lha
menika sami kalih panginten kula,Eyang. Bilih Putri Harisbaya namung minangka
bebungah kemawon ”
“Ketingalipun
mekatan,Wayah Prabu. Nanging mangke Pajang badhe kecelik, amargi Cirebon badhe
nyengkuyung Mataram kaliyan Pangeran Benawa.”
“Wah
, Eyang wicaksana saestu.”
”Lajeng
kenging menapa Wayah Prabu ketingal sungkawa? Menapa putri Harisbaya menika
katresnan panjenengan?”
“Leres,Eyang.
Nalika semanten kula sampun nate janji badhe nglamar piyambakipun manawi kula
sampun jumeneng Nata ing Sumedhanglarang. Emanipun Putri Harisbaya sampun dipun
garwa Panembahan Ratu.”
“Wah
, damel mendhokoling manah, Wayah Prabu.”
“Leres
Eyang. Kamangka Kula pengin Putri Harisbaya menika mbenjang dados garwa kula.”
“Inggih.
Kula saged ngraosaken saeba gerahing panggalih panjenengan. Menapa kula
kepareng ngaturaken pamrayogi?”
“Cobi
Eyang, Pamrayogi panjenengan kados pundi?”
“Satunggaling
cara inggih kanthi nggecak perang Cirebon.Lajeng ngrebat Putri Harisbaya.”
“Manawi
ngaten kirang sae, Eyang. Kejawi nglanggar paugeraning agami ugi kirang sakeca
manawi kapireng tiyang sanes,mosok perang mung amargi rebutan wanita .”
“Kados
pundi saupami Panembahan Ratu dipun damel duka?”
“Kersanipun
kados pundi?”
“Dipun
runtuhake kawibawanipun Panembahan Ratu minangka Panguwasa Cirebon.”
“Lajeng?”
“Sasampunipun
mekaten nembe dipun gecak perang.”
“Caranipun?”
“Awakipun
piyambak ,mertamu dhateng Cirebon. Kanthi pikajeng ngetingalaken bilih samenika
Sumedhanglarang sampun mboten dados reh-rehanipun cirebon malih. Malah sampun
sadrajad kaliyan cirebon. Kanthi mekaten panembahan Ratu badhe lingsem kaliyan
para ratu sanes, sasampunipun ligsem mesthi badhe duka, manawi duka mesthi
pengin nguwaosi Sumedhang malih ”
“O,ngaten,Eyang.
Lha menawi ngaten kula sarujuk”
“Kanthi
menika awakipun piyambak kedah damel benteng langkung rumiyin kangge ngawekani
mbok bilih Cirebon nggecak perang dhateng Sumedhanglarang.”
“Leres,
Eyang Patih. Kula pengin damel Beteng enggal wonten Ing Dayeuhluhur ”
“Kenging
menapa mboten wonten Kuthamaya kemawon?”
“Ngaten
Eyang.Kula gadhah pawadan ingkang gumathok.”
“Kados
pundi pawadanipun,Wayah Prabu?”
“Sepisan,
amargi ing Sumedhang larang dereng wonten betengipun.Kaping kalih , Ing
Dayeuhluhur punika wonten Pasiten Kabuyutan ingkang dipun sucekaken.Kacarios
menika kala emben mujudaken panggenan petilasan saking Dahyang Sumedhanglarang.
Dados panggenan kasebat perklu dipun lestarekaken.”
“O,
Inggih sae menika.”
“Kaping
tiganipun,Dayeuhluhur mujudaken lerenging redi, satemah gampil kadadosaken
papan Pertahanan. Langkung-langkung manawi dipun serang mengsah, langkung
gampil saget ngasoraken.”
“Inggih
manawi mekaten kula sarujuk sanget.”
“Menawi
mekaten wiwit benjang kedah enggal nyamektakaken para tukang kangge damel
benteng saha kitha Dayeuhluhur.”
“Sendika
dhawuh, Wayah Prabu.”
Ora
let suwe sabanjure wong-wong padha gawe beteng lan kutha ing Dayeuhluhur. Para
tenaga Ahli lan para tukang dilumpukake didhawuhi gawe beteng lan kuthagara.
Satemah
kanthi wektu sing ora suwe wis dadi beteng lan kuthagara. Malah alon-alon uga
wis bisa dadi. Kuthagara kuwi sinebut Kuthagara Dayeuhluhur.
Sawise
Kedhaton Dayeuhluhur wis dadi Sang Prabu Geusan Ulun mundhut pirsa menyang
pepatihe.
“Eyang
Patih jaya Prakosa.”
“Inggih
wonten dhawuh, Wayah Prabu.”
“Maturnuwun
awit dika dhalah para prajurit lan kawula sampun paripurna anggenipun damel
kedhaton enggal.”
“Kasinggihan
Wayah Prabu, menika wau awit saking karyanipun kawula Dalem ingkang sami setya
tuhu dhumateng prajanipun.”
“Matur
nuwun Eyang.”
“Samenika
ngaten ,Wayah Prabu.”
“Kados
pundi pangrencana ingkang kala emben punika.?”
“Oh,
ngengingi mertinjo dhateng Cirebon lan Putri Harisbaya?”
“Inggih,
Awit samenika Sumedhanglarang sampun kiyat betengipun kapara kedhaton wonten
kalih.”
“Inggih
Eyang, manawi mekaten kados pundi manawi bidhal benjang menika?”
“Langkung
prayogi ,Wayah prabu.”
“Ewasemanten
kula badhe pamit Kanjeng Ibu rumiyin.”
“Inggih
Wayah, kangge sawetawis wekdal punika kersanipun Kanjeng Prameswari ingkang
nyepeng panguwaos.”
Ing
sawijining dina kang wis ditemtokake, Prabu Geusan Ulun dhawuh supaya enggal
budhal menyang Cirebon. Saperangan Bregadaning prajurit jadhon-jadhon
dipangarsani dening Sang Prabu. Patih Jaya Prakosa,Senapati Wiradijaya,
senapati Kondhang Hapa lan Senapati Pancarbuwana datan keri padha melu
rombongane sang prabu. Sawetara kuwi panguwasa ing Sumedhanglarang Kaasta
ingkang Ibu Ratu Satyasih maneh nganti baline prabu Geusan Ulun.
Nalika
para tamu wis tekan Kedhaton Cirebon, dheweke padha tinampa pribadi dening Sang
Prabu Panembahan Ratu lan Sang prameswari , putri Lampok Angroros, Kanjeng Ratu
Pajang. Geusan Ulun rumangsa seneng amarga ora ketemu Putri Harisbaya.
Satemene
Putri Harisbaya kanthi sesidheman ngulati tamu-tamu saka Sumedhanglarang kuwi.
Dheweke golek keterangan ngenani kahanane Prabu Geusan ulun sing biyen jeneng
Angka Wijaya.
Putri
Harisbaya rumangsa lega atine amarga dheweke weruh Prabu Geusan Ulun ora
didherekake karo Prameswarine.Malah miturut pawarto Ratu Sumedhanglarang sing
isih enom kuwi durung kagungan garwa. Mulane penggalihe Putri Harisbaya dadi
bombong. Rasane dheweke pengin enggal ketemu Prabu Geusan Ulun. Nanging dheweke
wedi yen ora miturut tatakrama lan paugeraning agama. Sanajan kepiye wae
dheweke kuwi isih garwa sah Prabu Panembahan Ratu.
Tamu
agung saka Sumedhanglarang disugata dhaharan sing enak-enak lan mujudake
dhaharan sing pinilih .Amarga sing olah-olah para ahli masak ing tlatah
Cirebon.
Jagongane
antarane Prabu Geusan Ulun lan Panembahan Ratu lumaku kanthi gangsar, kaya dene
banyu sing mili ing kali.Dheweke padha ngandhakake sesambungane antarane Pajang
lan Mataram sing saya kurang becik.Dheweje sakloron padha sarujuk ora bakal ngewangi
Pajang apa dene Mataram.
|
Bojana
andrawina wusanane rampung, sakarone padha marem karo panemune dhewe-dhewe sing
pranyata meh padha. Dina Esuke prabu Geusan Ulun lan andhahane padha siaga bali
menyang Kraton Sumedhanglarang.
5.Maling Aguna
A
|
na kreta kencana
ngedhegake lakune Prabu Geusan Ulun lan sapengombyonge. Kreta kencana kuwi
kreta Kraton Cirebon.Sing ana sajeroning kreta ora liya Putri Harisbaya.
Dheweke ngerti manawa Geusan Ulun sak rombongane bakal mulih menyang
Sumedhanglarang. Awit kederenge kepengin nemoni Geusan Ulun. Mulane dheweke
metu saka Kraton Cirebon ngajak embane. Lan dhawuh marang kusir kreta supaya ndherekake
anggone bakal mapagake lakune Geusan Ulun.
Nalika
Geusan Ulun sapengombyong wiwit ninggalake kuthagara Cirebon, ana sawijining
prajurit caos palapuran manawa lakune ora bisa mbacut amarga dicegat kreta
kencana saka Cirebon sing digeret jaran loro.
“Prajurit,
coba tilikana sapa sing ana njero kreta kencana Cirebon kae !” Pangandikane prabu
Geusan Ulun.
“Sendika
dhawuh, Gusti.”Wangsulane Prajurit.
Ora
let suwe prajurit kuwi wis bali.
“Nyuwun
pangapunten, Sinuwun. Piyambakipun Putri Harisbaya. Nyuwun pinangih panjenengan
Dalem. Mboten badhe kesah manawi dereng pinanggih”
“Wadhuh,ndrawasi
menika Eyang Patih.”
“Prayogi
dipun panggihi rumiyin, Wayah Prabu.”
“Kados
pundi mangke manawi dados perkawis, Eyang Patih?”
“Katimbang
mboten saged nglajengaken lampah.Sepinten awratipun manggihi. Malah
keleresan.Wayah Prabu.”
“Keleresan
kados pundi Eyang?”
“Lha
inggih. Keleresan kangge nambani raos kapang.”
“Wah,
Eyang menika malah ngaten.”
Kanthi
ati sing kumesar Prabu Geusan Ulun nyedhaki kreta kencana Cirebon kuwi.Bareng
Sang Prabu nyedhaki kreta kuwi age-age Putri Harisbaya nginguk, lan terus
medhun saka kreta.
|
“Ana
apa, Dhi Ajeng. Nyegat lakuku?”
“Kula
pengin pinangih,Kang Mas.”
“Yen
wis ketemu.”
“Sampun
dangu anggen kula ngentosi panjenengan wonten Pajang, Ewosemanten panjenengan
tega sanget dhateng kula. Kula kapang sanget, KangMas.”
“Ya,
sing gedhe pangapuramu, Dhi Ajeng. Sakondurku saka Pajang, Rama Prabu sing
gerah santer seda. Aku ngenteni wektu setahun lagi bisa jumeneng nata.”
“Nanging
panjenengan sampun nyelaki janji.Ngendikanipun badhe murugi kula sasampunipun
jumeneng nalendra.”
“Sepisan
maneh aku njaluk ngapura, Dhi Ajeng. Sawise aku jumeneng nalendra aku repot
banget amarga kudu ngelar wewengkon lan gawe kedhaton anyar.Satemah ora ana
wektu longgar.”
“Wusananipun
kula ingkang dados banten, dados garwanipun priyantun ingkang mboten kula
tresnani.”
“Lha
terus kersane sliramu, kepiye?”
“Kula
badhe ndherek dhateng Sumedhanglarang, Kang Mas”
“Dhi
Ajeng, kaya mengkono kuwi kurang
prayoga. Bisa–bisa aku didakwa dadi maling aguna. Amarga nyolong garwane
liyan?”
“Lha
menawi kula ingkang kesah piyambak menapa ugi kadakwa dados maling aguna,Kang
Mas?”
“Lha
yen ngono aku ora ngerti, Dhi Ajeng. Coba dak rembuge dhisik karo para
sentanaku.”
“Kersanipun
kula ingkang ngrampungi perkawis menika, Sinuwun.” Ature Patih Jaya Prakosa.
“Lajeng
kados pundi caranipun, Eyang Patih?”
“Ngaten
Wayah Prabu, Perkawis Kanjeng Putri Harisbaya menika tanggel jawab kula kaliyan
Senapati Pancar Buwana. Kanjeng Putri Harisbaya kabeta dhateng kuthamaya dipun
dherekaken Senapati Wiradijaya.Wayah Prabu dipun dherekake Senapati Kondhang
Hapa lan sawetawis prajurit lajeng kondur kemawon dhateng Dayeuhluhur.”
“Kados
pundi manawi Cirebon ngawuningani lajeng ngerikaken wadya bala nguyak mriki?”
”Kula
sapendherek ingkang badhe ngadhepi. Samenika Wayah Prabu lajeng kondur ngrumiyini
kemawon dhateng Dayeuhluhur.”
“O,
ngaten?Kanthi mekaten kula mboten dipun dakwa dados maling aguna, Eyang Patih.”
“Inggih
leres.”
“Inggih
manawi mekaten kula ngrumiyini, Eyang Patih.” Sabanjure Sang Prabu pamitan karo
katresnane.” Dhi Ajeng Putri Harisbaya, sing gedhe pangapuramu, pun kakang
dhisiki laku tumuju kedhaton Dayeuhluhur.Sabanjure amrih prayogane rembugen
karo Eyang Patih Jaya Prakosa!”
“Matur
nuwun, Kang Mas. Mugi-mugi tansah manggih wilujeng sedayanipun.”
“Inggih. Perkawis Putri Harisbaya kersanipun
kula kemawon ingkang ngrampungi.”Ature Patih Jaya Prakosa.
Ki
Patih ngrasakake saeba kaya ngapa rasane ngati Sang Prabu sing sarwa salah.
Nanging
kanggone Patih Jaya Prakosa nyolong Putri Harisbaya kuwi minangka kanggo sarana
ngloropake kawibawane Prabu Panembahan Ratu panguwasa Cirebon. Sabanjure kena
kanggo pancadan dumadine perang karo Cirebon. Amarga menang-meneng Patih Jaya
Prakosa wis nyiagakake prajurit sing kuwat , mapan ana tapel watese Kraton
Sumedhanglarang lan Cirebon. Kuwi mau kanggo ngawekani manawa ana serangan saka
Cirebon.
Sing
luwih wigati saiki nggawa Putri Harisbaya sacepet-cepete menyang sakjabane
wewengkon Cirebon ya ing tapel wates sing kanggo mesranggah para prajurit mau.
Sawanci wanci Cirebon ngerti ilange Putri Harisbaya. Lan terus ngerikake
wadyabala supaya nguyak, dheweke uwis bisa ngadhepi kanthi tenang.
Dina
esuke ing Keputren Cirebon dadi geger amarga ilange Putri Harisbaya. Sawijining
Emban kaget nalika ngulati kamare Sang Putri suwung. Ora ana tilas babar pisan
anane Putri Harisbaya. Kabeh para emban cethi padha nggoleki lungane Sang putri
nganti tekan ngendi-endi ,parandene ora ana sing bisa nemokake.
Salah
sawijining emban age –age caos palapuran ngenani ilange sang Putri
Harisbaya.Lan wusanane kabar kuwi tekan ngarsane Sang Prabu Panembahan
Ratu.Gawe kagete kang padha seba.
“Kena
apa Putri Harisbaya bisa ilang?” pitakone Prabu Panembahan Ratu sing wiwit
ndukani prajurit jaga sing caos palapuran.”Kena apa kowe padha ora bisa njaga?”
“Nyuwun
pangapunten Sinuwun.” Ature Senapati.
”Ketingalipun
ingkang kesah mboten namung Putri Harisbaya piyambak.Nanging kaliyan satunggal
emban tuwin setunggal kusir kreta kencana. Wonten ingkang mangertos bilih
bidhalipun nitih kreta kencana mawi kudha kalih.”
“Lha
terus menyang ngendi lungane?”
“Saking
panginten kula, Putri Harisbaya dipun culik Prabu Geusan Ulun.”
|
“Lho apa alesane?”
“Menika
namung panginten kula.Mbok bilih Gusti Prabu sampun kesupen pinten-pinten tahun
kepengker, nalika Ratu Sumedhanglarang menika tasih nami Angka Wijaya,
Panjenenganipun nate meguru dhateng Pajang.”
“Ya
aku ngerti, Nanging apa gegayutane karo Putri Harisbaya?”
“Gusti
Prabu mbokbilih ugi wuninga Putri Harisbaya nalika semanten ugi meguru ing
Pajang. Kekalihipun mbok bilih sampun sesambetan katresnan lan mbok bilih
sampun nate prasetya badhe sesemahan. Nanging kasunyatanipun benten. Panguwaos
Sumedhang gerah santer , lan nimbali
supados putranipun kondur.
Sasampunipun
Ki Gedheng Sumedhanglarang seda. Setahun candhakipun Pangeran Angka Wijaya
kajumenengaken Nalendra Sumedhanglarang. Lan amargi pengaruhipun Ki Patih Jaya
Prakosa, Sumedhanglarang misah saking panguwaos Cirebon.”
“Terus?”
“Ingggih
amargi karepotanipun ngiataken negari saha ngelar jajahan, Sang Prabu ngantos
supe dhateng Putri Harisbaya. Lha , wekdal semanten ingkang nguwasani Pajang
Arya Pangiri. Arya Pangiri kepengin nyusun kekiyatan kangge ngadhepi Mataram.
Arya Pangiri nyuwun panyengkuyung Panjenengan Dalem kanthi bebungah Putri
Harisbaya.”
“Ya,
aku wis cetha Paman.Pancen satemene aku kurang sarujuk kanthi cara kaya ngono
kuwi.”
“Leres,
kanthi mundhut garwa Putri Harisbaya, kersa mboten kersa Gusti Prabu kedah
mbiyantu Pajang menawi mengsah Mataram.”
“Ya.
Kepiyea wae Putri Harisbaya saiki isih dadi garwaku sing sah. Maling aguna kuwi
sawijining tumindak nistha.”
“Leres.
Samenika menapa ingkang kedah dipun tindakaken?”
“Saiki
Ingsun dhawuhake supaya ngrebut baline Putri Harisbaya saka tangane Prabu
Geusan Ulun.”
“Sendika
dhawuh, Kanjeng Sinuwun. Samenika ugi kula nyuwun idi palilah medal pasilan,
ngerikaken prajurit kudha nguyak plajaripun Prabu Geusan Ulun.”
“Ya
sing ngati ati!”
Senopati
Wiralodra age-age dhawuh marang Tumenggung Suradipati, supaya mangarsani
prajurit kudha panguyak kuwi.
Playuning
prajurit kudha prasasat kaya lakuning jemparing. Ora let suwe wis tekan ing
sawijining papan palerenan nanging sajake lakuning rombongan Sumedhang wis
adoh.
Sawijining
prajurit dumadakan nyedhaki pangarsa laku.
“Ana
apa prajurit?”
“Kanjeng
Tumenggung. Kula nembe kemawon nganda sawenehing ganda wewangi ingkang aneh.
Lan ketingalipun kula sampun nate ngganda wewangi menika.”
“Ana
ngendi?”
“Wonten
mrika ,Kanjeng.”Ature prajurit kuwi karo nuding pernahe papan pasiraman awujud
pancuran banyu sing tumiba sandhuwuring watu. Tumenggung Suradipati age-age
marani papan kuwi. Pranyata gandane padha karo ganda ing pasiramane putri
Harisbaya.
“Wah
iya. Bener . Sajake iki ganda minyak wangine Putri Harisbaya. Sajake Putri
Harisbaya lagi bubar siram ana papan kuwi.”
“Inggih,
tasih nganda sanget. Kanjeng.”
“Ya
yen ngono kangggo pepeling , manawa awake dhewe nate nganda wangi sing ora
salumrahe mula padha seksenana papan iki bakal dak jenengake Darmawangi.”
“Inggih
kula nyekseni Kanjeng.”
“Saiki
awake dhewe wis cukup anggone leren mulane ayo enggal mbacutake laku . Siaga.”
“Siaga...”
Prajurit
kudha kuwi sabanjure terus mlayu menyang arah Sumedhanglarang. Durung suwe
dheweke padha ninggalake Darmawangi, sabregada prajurit Sumedhang larang wis
padha nyegat ana ing enggokane dalan.
Senapati
Pancar Buwana sing ana ngarep dhewe, capeng methentheng karo nyegat dalan. Ing
sawurine ana para prajurit siaga nggawa tumbak lan pedhang ligan.
Menyang
ngendi lungane Patih Jaya Prakosa? Jebule dheweke siaga ana papan liya, lan
masrahake panyegatan kuwi marang Senapati Pancar Buwana.
“He
aku jaluk dalan” Getakane Tumenggung Suradipati saka sandhuwuring kudha.
“Ora
bisa. Arep menyang ngendi lan apa perlumu?”Kandhane Senapati Pancar Buwana
kebak kawibawan.
“Aku
arep nguyak maling aguna.”
“Kene
ora ana playune maling aguna.”
“Aku
arep nguyak Prabu Geusan Ulun sing wis nyolong Garwane Ratu Gustiku.”
“Ratuku
Gustiku Prabu Geusan Ulun ora nyolong. Nanging Putri Harisbaya sing melu
dhewe.”
|
“Emboh ora idhep. Etuk ora etuk dak jaluk
bali.”
“Jaluken
yen isoh.”
“Rasakna
landheping pedhangku!” Kandhane Tumenggug Suradipati, karo mlumpat saka
gigiring kudha. Mobahe kaya manuk sriti nyamber mangsane. Kumlabeting pedhang
kaya dene arep nyigar dhadhane Senapati Pancar Buwana.
Senapati
sing wis kebak pengalamane kuwi, mlumpat nengen karo nyabetake pedhange marang lengene
Tumenggung Suradipati.
Sajake Tumenggung Suradipati ngerti manawa
serangane bakal diendhani. Dheweke terus mlumpat salto memburi terus mbengok.
“Serang!”
Mulane
prajurit kudha Cirebon terus nyerbu ngrabosa mungsuh ing dharatan. Peperangan
kuwi dadi dedreg. Senapati Pancar Buwana ngadhepi Tumenggung Suradipati kanthi
trengginas.Sanajan kekuwataning awak wis suda kepangan umur nanging taktike
isih bisa ngimbangi mungsuhe sing isih enom kuwi.
Patih
Jaya Prakosa mung nggatekake saka kadohan ing papan sing rada dhuwur.Dheweke
bisa mesthekake manawa Prajurit Cirebon ora bakal kuwawa ngasorake prajurit
Sumedhanglarang.
Sethithik-mbaka
sethithik serangan prajurit Cirebon bisa dikalahake. Siji mbaka siji jarane
dirampas. Manawa diterusake suwe-suwe mesthi prajurit Cirebon bakal kasoran.
Suradipati age-age mlupat mundur karo aweh tandha supaya prajurit Cirebon
ninggalake gelanggang payudan.
Krungu
singsote Tumenggung Suradipati. Prajurit Cirebon ngundhakake serangane.Sawise prajurit
sumedhang suda kaprayitnane age-age padha mlumpat mundur lan mlayu ninggalake
payudan.
Senapati
Pancar Buwana durung bisa ngalahake mungsuhe, amarga Tumenggung Suradipati wis
ninggalake payudan. Nalika Pancar buwana bakal nguyak playune prajurit Cirebon,
keprungu swarane jaya Prakosa saka dhuwur.
“Ora
sah diuyak!.
“Lajeng?”
“Dheweke
mung pucuke para prajurit sing padha nguyak. Bregadaning prajurit satemene isih
ana mburi. Luwih becik awake dhewe terus mundur tekan tapel wates
sumedhanglarang. Iki isih wewengkon Cirebon.”
“Iya,
Kakang Patih.” Kandhane Pancar Buwana karo ndhawuhake para prajurit supaya
nerusake laku menyang Sumedhanglarang. Dene prajurit Cirebon wis ora katon tabete. Dheweke wis
mundur menyang arah Cirebon lan mesthine bakal nglapurake marang Senapati
Wiralodra.
Sawise
para prajurit panguyak wis tekan ngarepe Senapati Wiralodra, age-age caos palapuran
ngenani kadadean kuwi. Senapati Wiralodra nyuwun idipalilah marang Sang Prabu
Panembahan Ratu supaya oleh ngrabasa perang menyang Sumedhanglarang. Tanpa
dipikir kanthi dawa Prabu Panembahan Ratu nayogyani.
Ganti
kang cinarita ora kaya lakune Putri Harisbaya karo Senapati Wiradijaya. Nalika
samana wis tekan ing Kuthamaya. Sabanjure Senapati Wiradijaya mapanake Putri
Harisbaya ana kaputren. Lan dijaga rapet dening prajurit pinilih. Ora sadhengah
uwong oleh ana sakiwa tengene papan kuwi.
Sang
Prabu Geusan Ulun dhewe wis tekan Dayeuhluhur karo leren ngleremake penggalihe.
Dheweke nglengganani manawa perkara
Putri Harisbaya kuwi bakal nuwuhake daredah karo Cirebon. Apa mungguhna
peperangan bisa disuwak?
Senapati
Kondhang Hapa ndhawuhake para prajurit supaya padha jaga ing sakiwatengene Kedhaton.
Aja nganti ana sing ngganggu Sang Prabu anggone lerem.
Prabu
Geusan Ulun katon mlaku-mlaku ana sajroning taman dhewekan.Penggalihe isih
mubeng-mubeng kelingan Putri Harisbaya. Wis pirang-pirang tahun dheweke ora bis
ketemu. Ayune rupa saya sumunar, nanging apa kira-kira bisa kapundhut garwa ?
Amarga saiki dadi garwane liyan . Lha rak kuwi jeneng nglanggar
kasusilan?Mulane luwih prayoga manawa dheweke tetep njaga sesambungan kuwi
supaya ora nuwuhake kadurakan.
Sabanjure
prabu Geusan Ulun lungguh ana dhingklik dawa ing petamanan. Kaendahane petamanan
Dayeuhluhur wis ora dadi kawigatene. Penggalihe mung tumuju marang sijine
jeneng, yakuwi Putri Harisbaya.”Wah, prayogane aku leren sawetara.”
Panggresulane.
Sang
Prabu terus nyarekake awake ana dhingklik dawa ing petamanan sangisore uwit
jambu. Sumiliring angin amimbuhi swasana kang edhum kuwi saya ngepenakake
sarira. Sang Prabu terus keturon ana dhingklik dawa kuwi.
Dumadakan
panjenengane rumangsa ana ing Kraton Cirebon, mlaku mlebu ing pendhapa Cirebon.
Katon para menak lan pangeran padha mangayubagya rawuhe. Dheweke padha ngungun
karo panjenengane. Geusan Ulun rumangsa pekewuh. Ana sing ngrasani alon nanging
dheweke krungu.
“Wah,
Ratu Sumedhang kuwi pancen gantheng tenan.”
“Iya.
Irunge wae mancung.”
“E,
delengen bathuke! Sumunar.”
“Sajake
wonge grapyak.”
Praupane
Geusan Ulun dadi panas bareng dirasani kaya mengkono kuwi. Apa maneh rerasan
kuwi isih dibacutake.
“Sajake
panjenengane kuwi dudu salumrahe Ratu.”
“Lha
terus.?”
“Dheweke
kuwi ratu wingit.Delengen bathuke ngemu cahya. Kuwi nandhakake sawijining ratu
sing duwe daya linuwih.”
“Luwih
nggon apa?”
”Luwih
ngenani ngilmu lan kasektene.”
Geusan
Ulun terus nemoni Panembahan Ratu sing wis nunggu ana sasana bojana. Panembahan
Ratu ngaturi tamu-tamune supaya dhahar bebarengan. Geusan Ulun lungguh karo
Patih Jaya Prakosa lan para senapatine telu. Sawetara kuwi Panembahan Ratu
diapit-apit Senapati Wiralodra lan kadang sentana liyane.
Panembahan
Ratu nepungake garwa prameswarine, Putri Lampok Angroros utawa Kanjeng Ratu
Pajang. Lan panjenengane sing nyugata dhedhaharan marang para tamune.
Dudu
prameswarine sing dadi kawigatene Geusan Ulun. Nanging pramuladi sing ngladeni
para tamu. Pramuladi kuwi mau ora liya Putri Harisbaya. Iki sing gawe kagete
Geusan Ulun, nganti panjenengane ora bisa kumecap apa-apa. Nalika nyuguhake
dhaharan marang Geusan Ulun,Sang putri njiwit astane Geusan ulun.
Geusan
Ulun mbudidaya ngampet mubaling ati. Sentanane papat padha ngerti manawa
prastawa kuwi mujudake kalodhangan sing digunakake Putri Harisbaya kango nemoni
Geusan ulun.
Geusan
Ulun dhewe wedi manawa kadadean kuwi dingerteni karo Panembahan Ratu, amarga
bisa ngundang bebaya.Geusan Ulun mung ngampet ambegan lan nyoba nguwasani
grenjolaning ati. Dheweke nganggep kabeh iki mujudake pacoban kanggo dheweke.
Nalika
tatacara dhahar wengi wis rampung, Geusan Ulun rumangsa sayah banget, Gangguan
saka Putri Harisbaya uga wis ora ana. Panembahan Ratu isih ngajak omong-omong
ngenani negara lan majuning negara manca , mligine perkara Kraton Pajang.
Geusan
Ulun dipapanake ana panginepan kanggo tamu Agung Kraton. Papan kuwi apik banget
lan sarwa komplit. Apa wae keperluane tamu bakal disudiyakake kanthi cepet.
Ing
paturon kang empuk, Geusan Ulun ora bisa ngeremake netrane kamangka wayahe wis
wengi.
Ing
sepining wanci wengi kuwi dumadakan ana sawijining pawongan mara nyedhak
alon-alon.
Geusan
Ulun terus tangi, amarga kepengin ngerti sapa wonge. Saya cedhak,saya cetha
manawa sing teka kuwi Putri Harisbaya.
Ayune
Putri Harisabaya saya katon cetha ngegla, dumadakan awake Prabu Geusan Ulun
rumangsa ngoplok kaweden. Amarga wedi dheweke bingung apa sing kudu
ditindakake. Pikirane peteng banget.
‘Apa
kabare Kakang Angka Wijaya?’ Panyapane Sang Putri.
‘Aku...apik-apik
wae, Dhi Ajeng.’
‘Ah,
sokur,Kang Mas. Sajake Kang Mas kadhemen.’
‘Na...nanging
aja nyedhak mrene.Dhi Ajeng.’
‘Lha
ngapa? Apa Kang Mas pengin aku mati nglalu ana kene?’
‘Adhuh..aja!,
Dhi Ajeng.’
Geusan
Ulun bingung banget. Kudu ngandhani kepiye marang Putri Harisbaya iki? Aku kudu
rembugan karo punggawaku.
‘Iya,
Dhi Ajeng. Lungguha sawetara . Aku dak menyang buri.’
‘Apa
perlu didherekake?’
‘Aja!
Apa kandhane wong liya mengko?’
Geusan
Ulun terus nemoni Patih Jaya Prakosa ing kamar sisih lan ngepasi durung sare. Dheweke
isih jagongan karo adhine tetelu.
‘Adhuh
Eyang Patih.Kula nyuwun tulung.Putri Harisbaya samenika wonten kamar kula.
Menapa ingkang kedah kula tindakaken?Malah piyambakipun ngancam badhe nganyut
tuwuh.’
‘Wah,
gawat.’
‘Kula
bingung, perkawis menika ruwet sanget. Kados nedha woh simalakama,manawi dipun
tedha ibunipun pejah, menawi mboten dipun tedha anakipun ingkang pejah.’
‘Gusti
Prabu, miturut pemanggih kula, saenipun Putri Harisbaya dipun asta kundur mawon
dhateng Sumedhanglarang.’
‘Kenging
menapa?’
‘Dipun
asta utawi mboten dipun asta, tetep badhe nuwuhaken perkawis ageng.
“Kok
saged, Eyang?”
“Amargi
dhatengipun Putri nilaraken garwa ing wayah tengah dalu, sampun ndadosaken
cubriya ingkang awon. Wayah Prabu badhe kadakwa sampun nyenyamah dhateng Putri
Harisbaya.’
‘Dadose
Putri Harisbaya dipun asta dhateng Sumedhang?’
‘Inggih,
saenipun ngaten.’
‘Menapa
Eyang Patih sagah tanggel jawab?’
‘Inggih
kula sagah tanggel jawab sadayanipun.’
‘Ingkang
cetha , Panjenengan sedaya kedah wantun ngadhepi serangan prajurit Cirebon,
manawi Putri Harisbaya kabeta dhateng Sumedhanglarang. Nanging sawetawis menika
kula mboten purun kepanggih kaliyan piyambakipun manawi dereng karampungan.’
‘Ampun
kuwatos ,Wayah Prabu.’
Lan
wusanane ing wengi kuwi uga Putri Harisbaya kaboyong menyang Sumedhanglarang,
kanthi cara sesidheman, nganti ora ana wong sing ngerti.
Nalika
kuwi dumadakan ana jambu sing tiba nibani raine Geusan Ulun sing lagi sare ana
dhingklik dawa ing petamanan. Sanalika Prabu Geusan Ulun tangi lan dadi kagete.
“Wah,jebul
aku iki mau nyumpena. Pasumpenanku jebles karo lelakonku dhek wingi nalika gawa
Putri Harisbaya.”
Prabu
Geusan Ulun age-age nimbali salah sawijining prajurit jaga ing taman.”Prajurit.
Coba aturana Senapati Wiradijaya.”
“Sendika
dhawuh,Gusti Prabu.”
Prajurit
kuwi age-age mundur lan nindakake dhawuhe ratu gustine.Ora let suwe Senapati
Wiradijaya teka.
“Wonten
timbalan Dhawuh,Gusti Prabu?”
“Eyang
Wiradijaya, Kula pengin ngertos pawartosipun ngengingi Putri Harisbaya. Kados
pundi kawontenanipun?”
“Inggih,
panjenenganipun sampuin dumugi ing kedhaton Kuthamaya, lan sampun dipun jagi
kanthi rapet. Panjenenganipun ketingal saras kemawon. Pasuryanipun katingal
sumringah.”
“Inggih.
Lajeng dipun awat-awati kemawon, lan sedaya kabetahanipun dipun gatosaken,
sampun ngantos kekirangan!”
“Sadaya
sampun dipun cekapi,Gusti Prabu.”
“Matur
nuwun. Piyambakipun kersanipun wonten mrika rumiyin. Lajeng ngengingi Eyang
Patih Jaya Prakosa kaliyan Eyang Pancar Buwana kados pundi kawontenanipun?”
“Piyambakipun
nembe kemawon ngunduraken saperangan Prajurit Cirebon ingkang dipun pangarsani
Tumenggung Suradipati.”
“Ketingalipun
peperangan mboten saged kapenggak malih.”
“Ketingalipun
ngaten, Gusti Prabu.Perkawis Putri Harisbaya, sampun damel dukanipun Prabu
Panembahan Ratu. Panjenengan Dalem kadakwa dados maling aguna.”
6.Perang Rebutan Putri
N
|
alikane Putri Harisbaya mapan ing Kuthamaya kanggo
sawetara wektu atine tentrem, amarga wis ora mapan ing kuthagara Kraton
Cirebon. Kanthi ati kang kebak ing pengarep-arep dheweke nunggu tekane Pangeran
Angka Wijaya alias prabu Geusan Ulun.Putri Harisbaya nglengganani manawa isih
winengku Prabu Panembahan Ratu Ing Cirebon. Mulane Prabu Geusan Ulun sing
tansah nengenake marang kasusilan, ora kersa nemoni.
Sang
Putri dikancani karo sawijining Emban saka Cirebon. Dheweke lila legawa
dherekake bendarane mau, ora ngelingi apa kang bakal kelakon.Bakune dheweke
tansah setya bekti marang bendarane.
Dheweke
padha ngentekake wektu sadina-dinane ana ing taman kaputren lan kadhang-kadhang
mlaku-mlaku ana ing sakiwa tengene Kedhaton.Nganti ing sawijining dina ana wong
dodol sing mikul kranjang loro nganggo pikulan kayu.
Wong
dodol mau katon leren ana sakjabaning pager keputren.Sajake dheweke kesayahen.
Dheweke leren ana sangisore wit trembesi sing gedhe ngrembuyung godhonge.Ana
ing oyoding trembesi kuwi dheweke nglungguhake bokonge.
“Biyung Emban, apa dodolane bakul sing leren kae?”
“Boten
mangertos Gusti Putri. Menapa kula perlu taken?”
“Iya
, Biyung Emban. Coba takona dhisik.”
“Sendika,
Gusti Putri.”
Emban
Kunthi age-age metu saka palataraning Keputren, lan dheweke ditakoni salah
sawijining prajurit jaga. Bareng wis diwenehi katerangan, Emban Kunthi oleh
metu. Pranyata dheweke kuwi wong bakul pepedha. Bakule kuwi isih enom lan sajak
kesayahen amarga mentas mlaku adoh. Kunthi tumuli caos palapuran marang
bendarane.
“Gusti
putri,tiyang menika sadeyan pepedha.”
“Dodol
pepedha?Kuwi kesenenganku Biyung Emban.Tukuwa sawungkus utawa rong wungkus!
Sasuwene ana kene aku durung nate dhahar pepedha.”
“Sendika
,Gusti Putri.”
Emban
Kunthi age-age mundhutake pepedha kanggo Gusti Putrine. Dheweke tuku rong
wungkus.
“Pak,
tumbas kalih wungkus.”
“O,
inggih. Sinten ingkang ngutus?”
“Gusti
Putri, ingkang ngutus.”
“O,
nika Gusti Putrine.”
“Inggih
Pak.”
“Wah
priyantune ayu sanget nggih,nanging kok kula ngungun ing atase Putri Kraton kok
remen ulam pedha, nggih ?”
“Inggih,
menika dados remenanipun wiwit wonten Cirebon.”
“O...napa
Gusti Putri saking Cirebon?”
“O,
mboten Pak.nyuwun pangapunten kula klentu.”
Sawise
mbayar Emban Kunthi age-age mlebu maneh menyang kaputren karo nggawa wungkusan
pepedha cacah loro. Dene bakul kuwi isih ngulati Emban Kunthi sing lagi mlaku lan Putri Harisbaya sing ana ing kori
keputren.
|
“Wis
genah cetha.” Panggresahe bakul pepedha karo mlaku ninggalake papan kuwi.
”Putrine ayu, lencir kuning, senengane pepedha, wiwit ana Cirebon. Ateges putri
kuwi Putri Harisbaya sing dicolong Prabu Geusan Ulun. Pranyata dheweke mapan
ana kene. Emane sing jaga akeh lan rapet. Ora saben wong bisa mlebu Kaputren.”
Bakul
pepedha kuwi pranyata dudu wong saka Sumedhanglarang. Amarga dheweke terus
lunga ora nawakake pepedha maneh. Dheweke mlaku banter tumuju menyang arah
Cirebon.
Wiradijaya
sing ngawat-awati Putri Harisbaya oleh palapuran saka prajurit jaga. Manawa
Putri lagi wae tuku pepedha saka sawijining bakul sing liwat.
“Apa,
mundhut pepedha?”
“Kasinggihan,
Gusti Wiradijaya.Cetha sanget Gusti Putri utusan Emban Kunthi mundhut pepedha.”
“Kowe
ora cubriya ,Prajurit?”
“Cubriya
kados pundi, Kanjeng?”
“Apa
lumrah yen kene ana wong dodol pepedha?”
“Inggih
pancen awis sanget, Kanjeng.”
“Lha,
kudune bakul kuwi dilacak saka ngendi asale.”
“Kersanipun
kados pundi, Kanjeng.”
“Mangertia
prajurit, pepedha arang banget didol ana wewengkon Sumedhanglarang. Amarga sing
akeh pepedha kuwi ing pesisir elor kaya dene Cirebon. Aku cubriya manawa bakule
kuwi wong saka Cirebon.”
“Lajeng,
kenging menapa tiyang Cirebon mboten pikantuk sadean wonten mriki?”
“Ya,
mesthi wae oleh. Nanging perkarane saiki awake dhewe lagi mugsuhan karo
Cirebon. Dadine kudu waspada. Kudune kowe nyandhet uwong kuwi nganti aku teka.”
“O,
nyuwun pangapunten,Kanjeng. Kula lepat.”
“Ya
wis. Besuk maneh kudu ngati-ati lan waspada. Aku percaya manawa bakul kuwi pengin
ngerteni anane Putri Harisbaya.”
“Wadhuh,
Kanjeng. Kula ngrumaosi lepat amargi bodho kula.”
“Ya
wis. Perkara iki aja dicritakake wong liya, dak uruse wae.”
“Sendika,
Kanjeng.”
“Lha
terus ciri-cirine uwong kuwi kepiye?
“Anu
Kanjeng. Tiyangipun tasih enem ngangge caping werni ijem. Mikul kranjang kalih,
ngangge clana lan rasukan cemeng.”
Senapati
Wiradijaya age-age nguyak bakul pepedha sing mentas ninggalake kaputren. Dheweke
nyuyak ijen. Saben weruh wong dodol sing mikul kranjang loro ditliti, nanging
ora ana sing duwe ciri-ciri kaya palapurane prajurit jaga.
Sanajan
mengkono Senapati Wiradijaya tetep nguyak menyang arah Cirebon. Nalika tekan
ing kampung Serang dheweke weruh bakul sing nggawa pepedha. Age-age dheweke
nguyak.
“He
bakule pepedha.Aku tuku.”Bengoke Wiradijaya.
Bakule
pepedha kuwi kaget. Dheweke noleh ngulati Senapati Wiradijaya kaya sing wis
nate diweruhi. Nanging ana ngendi?Wusanane dheweke kelingan manawa wong kuwi
nate dingerteni nalika mertamu ana Cirebon. Bakul pepedha kuwi age-age mlayu.
Dheweke ngerti manawa sing nguyak kuwi sawijining punggawa Kraton Sumedhanglarang.
Nanging mlayune rendhet amarga kabotan gawan. Mulane dheweke terus nyuntak pepedhane
ana papan sing akeh pasire, pepedha kuwi pating bececer ana ing wedhi utawa
pasir.Sabanjure dheweke terus mlayu nggeblas sabanter-bantere.
Wiradijaya
kepleset tiba kelangan burone lan sing tinemu mung pepedha sing pating bececer
ana pasir. Mulane dheweke menehi jeneng papan kuwi Pasirpedha.
Wiradijaya
nguyak maneh. Nalika tekan desa Situraja , Wiradijaya ketemu karo Patih Jaya
Prakosa sing bakal mulih menyang Kuthamaya.
“Arep
menyang ngendi, Dhi?” Pitakone Patih Jaya Prakosa.
“Aku
lagi nguyak mata-mata,Kakang.”
“Mata-pitaya
saka ngendi?”
“Yen
ora kleru saka Cirebon.Dheweke wis kasil ngerteni Putri Harisbaya ana ing
Kuthamaya”
“Wah
, yen ngono kudu dicekel.Supaya ora bisa palapuran menyang Cirebon”
”Iya
Kakang. Saiki ayo diuyak saka rong arah.Kakang saka sisih tengen ,aku saka sisih
kiwa.”
“Ayo!.”
Kandhane Jaya Prakosa karo mlayu saka sisih tengen banter banget.Sawetara kuwi
Wiradijaya mlayu saka sisih kiwa. Ora let suwe Jaya Prakosa nemokake pawongan
mlayu rindhik-rindhik lan ketok was sumelang. Bola bali dheweke noleh memburi
kaya dene wedi yen ana sing nguyak.
Jaya
Prakosa tambah ngandel manawa wong kuwi sing bakal diuyak. Dheweke age-age
ngecakake aji Bayu Sena sing katiyasane bisa mlayu prasasat lakuning angin.
Ora
nganti sakedheping netra bakul kuwi wis bisa kabanda.
“Kowe
mata-mata saka Cirebon ya?”
“Sanes
Kanjeng.”Wangsulane bakul saka Cirebon kuwi.
“Aja
ngapusi!. Kowe mau rak dodol pepedha ta?”
“Inggih
leres pancen kula sade pepedha.”
“Nanging
kowe tumindak dadi mata-mata.”
“Mboten,Kanjeng.”
“Yen
ora ngaku kowe dak jepitake ana wit debogan
iki!” Kandhane Jaya Prakosa karo nyelehake awake wong kuwi ana ing
antarane wit gedhang loro.
|
Nalika
kuwi Wiradijaya teka lan terus nyedhaki. Sabanjure wong loro kuwi padha
rembugan bakul iwak kuwi bakal
dikapakake.
Nanging
nalika Patih Jaya Prakosa lan Senapati Wiradijaya padha rembugan, bakul iwak
pedha kuwi nguculi bandane lan mlayu.
Nalika
wis padha rampung olehe rundhingan burone wis ora ana. Terus digoleki mrana
mrene ora ketemu.
“Adhi
Wiradijaya kanggo pengeling-eling , manawa awake dhewe nate nyekel mata-mata
lan dak sela ana wit gedhang iki. Mulane seksenana papan iki bakal dak paringi
jeneng Selagedhang.”
“Kakang
sabanjure kepiye.Burone diuyak maneh apa ora?”
“Ora
sah diuyak,Dhi . Kareben dheweke caos palapuran marang Prabu Panembahan
Ratu.Kanthi mangkono bakal dumadi perang gedhe antarane Cirebon lan
Sumedhanglarang. Lan awake dhewe bisa males ukum marang Cirebon sing wis
ngrubuhake Kraton Pajajaran.”
“Ya
yen mengkono aku sarujuk. Aku wis getem-getem pengin mateni prajurit Cirebon
saakeh-akehe. Sokur bage bisa ngrubuhake Cirebon.”
“Ayo
saiki bali wae menyang Dayeuhluhur, caos palapuran marang Gusti Prabu Geusan Ulun.”
Sabanjure
Patih Jaya Prakosa lan Senapati Wiradijaya padha mulih menyang Sumedhanglarang.
Nalika
bakul pepedha bisa uwal saka bebandane, dheweke mlayu lan nalika samana wis
tekan Kraton cirebon. Dheweke age-age caos palapuran menyang ngarsane Senapati
Wiralodra.
“Kepiye
pawartane Prajurit sandhi, sawise kowe menyang Kraton Sumedhanglarang?”
“Kasinggihan
Kanjeng, pangestu panjenengan kula saged uwal saking bebandanipun Patih jaya
Prakosa.”
“Lha
terus piye ngenani anane Putri Harisbaya?”
“Inggih,
Kanjeng miturut panaliten kula. Pranyata leres bilih Putri Harisbaya saestu
dipun beta dhateng kuthamaya.Panjenenganipun kapapanaken wonten sasana Kaputren
Kraton Sumedhanglarang ing Kuthamaya.”
“Ya
, matur nuwun. Dadi yen ngono awake dhewe duwe alesan bakal ngrabasa menyang
Sumedhanglarang.”Kandhane Senapati Wiralodra.”Saiki kowe lerena dhisik .
Aku dak caos palapuran ing ngarsane Sang
Prabu Panembahan Ratu.”
“Sembah
nuwun, Kanjeng Senapati.”
Ora
let suwe prajurit sandhi kuwi wis tekan ing bangsal kaprajuritan lan Senapati
Wiralodra wis ngadhep ing garsane Prabu
Panembahan Ratu.
“Nuwun
sewu, Kanjeng Sinuwun.”
“Iya
Senapati Wiralodra, bakal caos palapuran apa?”
“Miturut
palapuran saking prajurit sandhi , bilih Sang Putri Harisbaya samenika mapan
ing Kuthamaya.”
“Dadi
yen mangkono bener lamun garwaku Putri Harisbaya dicolong dening Prabu Geusan
Ulun?”
“Kasinggihan
dhawuh, Sinuwun.”
“Wis
kaping pindho, Sumedhang larang gawe dadakaning perkara. Sepisan dheweke wani
misah saka Cirebon, lan kapindho iki dheweke dadi maling aguna, nyolong garwaku
Putri Harisbaya.”
“Kasinggihan
dhawuh, Sinuwun.”
“Pancen
wis ora kena disanak Sumedhanglarang kuwi.”
“Kasinggihan
dhawuh, Sinuwun.”
“Saiki
wis entek kesabaranku. Dina iki uga siyagakna para prajurit segelar sepapan.
Kanggo ngrabasa Sumedhanglarang.Yen perlu njaluk bantuan saka Banten.”
“Sendika
dhawuh Sinuwun.”
Senapati
Wiralodra age-age nglumpukake para Tumenggung lan Wiratamtama. Sabanjure
dheweke kadhawuhan gawe senapati anyar cacah telu. Senapati anyar kuwi
Tumenggung Suradipati, Tumenggung Wangsadireja lan Tumengung Tohpati. Para
Senapati kadhawuhan nglumpukake para Tumenggung, para Tumenggung nglumpukake
para Wiratamtama, lan para Wiratamtama nglumpukake para Prajurit.
Dina
candhake Kraton Cirebon katon rame. Ana sing nyiyagakake sangu pangan, ana sing
nyiyagakake tendha kanggo mesanggrah lan liyaliyane. Dene para prajurit padha nyiyagakake
perabot perang kaya ta panah, tumbak, pedhang, keris lan tameng. Seminggu
anggone tata-tata wis rampung. Panglima Wiralodra dhewe sing bakal mangarsani
gelaring perang.
Nalika
para prajurit padha tata-tata ubarampene perang kanggo ngrabasa menyang
Sumedhanglarang, Sawijining Prajurit nunggang kudha ninggalake kutha Cirebon
kanthi kesusu. Dheweke milih dalan sing arang diliwati pawongan.
Kanthi
trengginas Wong nunggang kudha kuwi nggebrakake jarane menyang arah mangulon.
Pranyata
dheweke kuwi prajurit sandhi Sumedhanglarang. Dheweke bakal caos palapuran
marang prabu Geusan Ulun utawa Patih Jaya Prakosa. Ngenani siyagane Prajurit Cirebon sing bakal
ngrabasa menyang Sumedhanglarang kudu enggal diaturake.
Sawetara
suwe anggone Prajurit Sandhi mlayu nitih kudha, wayahe wis sore dheweke tekan
tapel watese Sumedhanglarang. Sanajan sayah awake, nanging dheweke tetep kudu
enggal caos palapuran. Nalika samana
Senapati Pancar Buwana isih mesanggrah ana tapel watese negara, mulane Prajurit
sandhi kuwi caos palapuran marang panjenengane.
“Nyuwun
sewu, Kanjeng Senapati.”
“Bakal
caos palapuran apa, Prajurit Sandhi ?”
“Kula
mangertos piyambak, kekiyataning Cirebon
ingkang badhe ngrabasa dhateng Sumedhanglarang. Piyambakipun sampun nyiyagakake
prajurit segelar sepapan ingkang
gungungipun wonten 2000 prajurit. Ingkang badhe mangarsani, Senapati Wiralodra piyambak. Lajeng ingkang pinangka
pangesuhing prajurit, Tumenggung Suradipati, Tumenggung Wangsadireja lan
Tumengung Tohpati.”
“Ya,
palapuranmu cetha banget,Prajurit sandhi, Aku matur nuwun banget lan kowe
enggal lerena dhisik”
“Sendika,
Kanjeng Senapati.”
Prajurit
sandhi kuwi age-age lunga lan Senapati Pancar buwana terus njupuk kulit kanggo gawe layang palapuran
menyang Kedhaton.
Ing
Wengi kuwi uga layang saka Senapati Pancar Buwana digawa menyang Dayeuhluhur
dening sawijining tumenggung sing bisa dipercaya, yakuwi Tumenggung Baskara.
Kanthi
nitih kudha pinilih, Tumenggung Baskara mlayokake jarane menyang arah kuthagara
Dayeuhluhur. Dheweke kepengin ngaturake nawala kuwi menyang Sang Prabu Geusan
Ulun piyambak utawa menyang Patih Jaya Prakosa.
Dina
esuke Tumenggung Baskara wis tekan watese kuthagara Dayeuhluhur lan sadhela
maneh bakal tekan ing kedhaton.
Tumenggung
Baskara terus mlaku tumuju menyang sasana sumewa ing ngarsane Sang Prabu Geusan
Ulun. Dheweke terus ngaturake nawala saka Senapati Pancar Buwana marang Patih
Jaya Prakosa sing lagi seba. Nalika samana pepak andher para nayaka Kraton
Sumedhanglarang padha seba. Senapati
Kondhang Hapa, Senapati Wiradijaya lan saperangan para sentananing ratu.
Layang
saka Senapati Pancar Buwana kuwi dirembug bebarengan. Patih Jaya Prakosa sing
maca layang kuwi terus ngandika.
“Ingkang minulya, Gusti Prabu Geusan Ulun, keparengna
mitados dhumateng kula tuwin para Senapati kangge mbetengi negari
Sumedhanglarang. Kula sadaya badhe ngadhepi mengsah kanthi sawetahing jiwa raga
tuwin kekiyatan saha pambudidaya.
Paduka
sampun ngantos kuwatos. Kula pitados mengsah mboten kuwawi mlebet dhateng
wewengkon Sumedhanglarang. Menapa malih dumugi ing Kuthamaya tuwin
Dayeuhluhur.”
“Inggih
,Eyang Patih Jaya Prakosa. Kula dhawuhaken wiwit wekdal menika, supados
ngerikaken wadyabala njagi tapel watesing Sumedhanglarang. Sampun ngantos
mengsah saged mlebet wonten ing Kuthagara.”
Krungu
negarane bakal diserang mungsuh, para kawula padha rumangsa kuwatir. Nalika
kuwi saperangan kawula lagi padha ndandani pasar. Nanging bareng krungu kawula
liyane padha gumruduk dadi prajurit manasuka, mulane gawean ndandani pasar
terus ditinggal lunga ngono wae. Dheweke ora nggatekake pasar sing lagi
didandani. Lan nganti saiki papan kuwi sinebut Kamnpung Darangdan.
Bregadaning
prajurit Sumedhang dipangarsani dening
Patih Jaya Prakosa piyambak. Budhal tumuju menyang tapel watese negara
Sumedhang-Cirebon.
Wusanane
Prajurit sing dipangarsani Patih Jaya Prakosa lan saperangan prajurit manasuka,
mlaku tekan ing tapel watese negara Sumedhanglarang-Cirebon. Ing kono ana papan
pategalan sing jembar.
Prajurit
Cirebon nalika samana uga wis tekan tapel watese negara Sumedhanglarang
Cirebon.Dheweke padha mesanggrah ing papan kuwi, sing lete mung udakara 1000
meter. Gunggunge prajurit Sumedhang sajake wis bisa ngimbangi kekuwataning
prajurit Cirebon.
Pasukan
Sumedhanglarang wis padha siaga nggawa tombak pating crangah sing di pangarsani
Senapati Pancar Buwana. Ing sawurine ana pasukan sing dipangarsani Patih Jaya
Prakosa, ngiras pantes minangka Panglima.
Ing
penjawat kiwa , katon Senapati Wiradijaya sing ngadeg kanthi gagahe. Ing
penjawat tengen , bregadning prajurit diasta dening Senapati Kondhang Hapa.
Kanthi
cetha ing kono katon pucuke tombak prajurit diasta Senapati Tohpati, Ing
sawurine Panglima Wiralodra, Penjawat kiwa dipangarsani Senapati Suradipati. Sawetara
ing penjawat tengen dipangarsani dening Senapati Wangsadireja.
Katone
parajurit sing bakal padha perang kuwi imbang. Panglima perang age-age menehi
dhawuh supaya enggal wiwit perang.
Jaya
Prakosa wis aweh sasmita kanthi pedhang diacungake munggah mengarep bebarengan
karo acungane pedhange Wiralodra saka Cirebon. Lan prajurit loro-lorone padha
ngrangsek maju golek mungsuh dhewe-dhewe.
Peperangan
pecah ing sandhuwuring lemah jembar lan bawera. Sakarone mujudake prajurit sing
wis digembleng kanthi becik , satemah peperangan wektu kuwi tinemune rame
banget.
Korban
wis padha wiwit tumiba, saperangan ana sing tatu awake. Senapati Tohpati wis
ngrangsek menyang ngarep mbabati prajurit rucah. Weruh kahanan kaya gono
age-age Senapati Pancar Buwana mlumpat maju. Prajurit Cirebon sing
ngalang-alangi lakune dibabat kanthi rosa lan pener.Ora let suwe Senapati loro
kuwi padha adhep-adhepan.Tanpa tedheng wigah-wigih senapati kuwi padha perang
tandhing siji mungsuh siji. Kebeneran dheweke padha duwe ilmu sing imbang.
Satemah perang tandhing kuwi dadi gayeng.
Ing
penjawat kiwa Senapati Wiradijaya wis maju nembus barisane prajurit Cirebon.
Ing sangarepe wis diadhang Senapati Wangsadireja.Tanpa adu tutuk maneh ,dheweke
padha perang tandhing sing gayeng
banget. Perang tandhing kuwi uga katon imbang
amarga sakarone padha satataran. Angel diarani endi sing bakal menang
lan endi siang bakal kalah.
Ing
penjawat tengen prajurit Sumedhanglarang, wis maju senapati Kondhang Hapa sing
terus ditampani karo Senapati Suradipati.Dhek wingi Senapati Suradipati wis
adhep-adhepan karo Senapati Pancar Buwana.Saiki adhepadhepan karo Kindhnag
Hapa.
Peperangan
kuwi pecah kanthi gayeng. Kekuwatan loro sing padha tangguhe , mulane dheweke
padha ora bisa ngrangsek maju. Padha-padha perang ing panggonan, ora bisa obah.
Saka
sandhuwuring gunung cilik ana sawijining wong lanang ngaggo jubah sing ngawasi
peperangan kuwi kanthi kebak kawigaten. Saben ana korban sing tiba, dheweke
ngelus dhadha. Dheweke banget nggetuni dumadine perang kuwi. Akeh prajurit
sing mati sia-sia.
Ngulati
kekuwataning prajurit, dheweke bisa mesthekake manawa karo-karone ora gampang
bisa ngalahake. Manawa kadadean kaya ngono kuwi nganti pirang-pirang dina, bisa
dipesthekake manawa bebanten prajurit saya akeh. Bebanten kanggo sapa lan
kanggo apa?Manawa mung rebutan wanita, kebangeten, kuwi ora jumbuh.
“Aku
kudu tumindak, supaya peperangan iki ora kebacut-bacut.” Panggresahe lirih.
Sapa sejatine pawongan kuwi?
Sapa
pawongan lanang sing umure udakara 30 tahun kuwi? Lan kena apa dheweke ora
nayogyani anane peperangan kuwi?
Pawongan
lanang sing nganggo jubah kuwi ora liya Pangeran Wirasuta, adhine ragil
Panembahan Ratu sing biyen dijuluki Pangeran Emas. Dheweke ora lila manawa
Cirebon kudu peperangan karo Sumedhanglarang amarga rebutan salah sawijining
wanita.
Sawetara
Pangeran Wirasuta mikir lan terus nemokake cara sing luwih prayoga kanggo
ngendhegake lakuning perang.
“Aku
kudu menyang Kutharaja Sumedhanglarang. Perkara iki kudu dirampungake kanthi
becik. Wiwitane aku bakal nemoni Prabu Geusan Ulun, bakal dak takoni kersane
satemene kepiye. Sabanjure aku uga pengin nemoni Putri Harisbaya supaya ngerti
karepe Sang Putri sing satemene.
Sabanjure
aku bakal matur marang Kakang Mas Panembahan Ratu. Muga –muga iki mengko
mujudake cara bisane peperangan kuwi karampungan. Kepiyea wae karampungane
perkara kanthi peperangan kuwi dudu mujudake cara sing prayoga, nanging malah
bisa nuwuhake perkara liyane. Wah kok kebangeten temen Perang Rebutan putri“
7.Bedhamen Mawa Ijol
A
|
na ing Kraton
Sumedhanglarang Pangeran Wirasuta takon
marang sawijining kawula. Bareng takon ngenani kedhaton pawongan kuwi tuwuh
rasa cubriyane. Pangeran Wirasuta nglengganani
, amarga kahanan perang kaya ngene. Ora mokal manawa saben pawongan
wajib dicubriyani. Mbok manawa didakwa sawijining mata-mata Cirebon.
Wusanane
Pangeran Wirasuta ora takon maneh. Sabanjure dheweke nggoleki dhewe sesidheman
. Nganti wusanane tekan ngarep Kedhaton Dayeuhluhur.
Kedhaton
kuwi digawe saka kayu-kayu sing bakoh lan awet. Payone sirap saka Kalimantan .
Betenge bakuh kukuh. Manawa direbut saka njaba , bakal kangelan amarga beteng
kuwi. Beteng kuwi mung bisa diserang saka ngarepan amarga sakiwa tengene
mujudake jurang jero lan mburine mujudake pegunungan julek.
Pancen
Prabu Geusan Ulun pinter anggone milih papan Kuthagara , ing sawijining papan
sing diayomi dening alam. Beda banget karo Cirebon sing kuthagarane mapan ing
papan kang bawera.
Sawijining
Prajurit sing weruh tekane pawongan lanang ngango jubah kuwi dadi was sumelang.
Sapa satemene pawongan kuwi?Apa dheweke sawijining tamu?Apa mata-mata saka Cirebon?
Prajurit
kuwi bingung. Beja wae nalika kuwi ana sawijining Wiratamtama sing nyedhak,
dheweke terus caos palapuran.
“Ana
apa prajurit?”
“Nyuwun
pangapunten, Kanjeng. Wonten tiyang jaler ngangge jubah wonten ngajeng
Kedhaton, menika tamu menapa sanes?”
“Endi
uwonge?”
”Mboten
tebih saking pager Kraton ,Kanjeng.”
“Ya,
dak takonane wae.”
Wiratamtama
kuwi age-age nyedhaki Pangeran Wirasuta lan nakoni kanthi trapsila. Dheweke
wedi manawa salah tampa.
|
“Nyuwun
pangapunten, Raden. Ketingalipun Raden sanes priyantun ngriki?. Menapa ingkang
saged kula biyantu?”
“O,
inggih Kisanak. Kula saking tlatah wetan. Kula badhe sowan Kanjeng Sinuwun
Prabu Geusan Ulun.”
“Kaleresan
Kisanak. Kanjeng Sinuwun samenika wekdal wonten Kedhaton, namung menapa
kepareng manggihi menapa mboten kula mboten mangertos.”
“O
inggih mboten dados menapa. Panjenengan aturaken kemawon bilih kula Ragil
Wirasuta.”
“Inggih,
badhe kula aturaken Sang Prabu.Ewa semanten mboten prayogi nengga wopnten
ngriki. Sumangga kula aturi lenggah wonten sasana pangrantunan.”
“Matur
nuwun.”
Wusanane
Pangeran Wirasuta didherekeake menyang sasana pangrantunan. Dene Wiratamtama
kuwi age-age caos palapuran menyang ngarsane Sang Prabu Geusan Ulun.
Nalika
samana Sang Prabu Geusan Ulun lagi nampa palapurane para Tumenggung ngenani
dumadine peperangan ing tapel wates.
“Peperangan
lumampah imbang, Sinuwun.Mbok bilih pinten-pinten dinten menika dereng saged
dipun pesthekake pundi ingkang badhe mimpang.
“Ya
iki sing ingsun sumelangake.”
“Kersanipun
kados pundi Sinuwun?”
“Satemene
aku ora kepengin peperangan iki nganti kebacut-bacut, nanging kepiye carane
ngrampungake ,Ingsun ora mangerti.”
“Nyuwun
pangapunten, Sinuwun. Kula sumela atur.”
“Ana
apa, Wiratamtama?”
“Ing
paseban jawi wonten tamu ingkang badhe sowan paduka.”
“Sapa
tamune?”
“Ngendikanipun
Ragil Wirasuta,namung ngaten Sinuwun.”
“Kepiye
ciri-cirine?”
“Panjenenganipun
ngagem jubah kados satunggaling dwija.”
“Aja,
aja...dheweke Pangeran Wirasuta. Ya aturana kanthi urmat supaya enggal mlebu!”
“Sendika
dhawuh ,Sinuwun.”
“Wiratamtama
mudha kuwi tersu mundur lan ngaturi Pangeran Wirasuta supaya enggal ngadhep.”
“Kula
nuwun, Sunuwun. Kula ingkang sowan.”Ature Wirasuta.
“Sumangga,
Pangeran Wirasuta.”
“Nyuwun
pangapunten, kula sowan mboten katimbalan.”
“Inggih
mboten dados menapa Pangeran, Wilujeng rawuh ing Sumedhanglarang.”
“Pangestu
panjenengan wilujeng lampah kula,Sinuwun.”
“Sakecakaken
anggenipun lenggah. Lajeng wonten kersa menapa keraya-raya tindak
mriki,Pangeran?”
“Inggih
Sinuwun,betek-betekipun kula nuruti pepenginan suci.”
“Pepenginan
ingkang suci kados pundi kersanipun, Pangeran.?”
“Kula
nggadhahi pepenginan supados peperangan ing antawisipun Sumedhanglarang kaliyan
Cirebon menika enggal rampung, mboten kelajeng-lajeng.”
“Caranipun
kados pundi ,Pangeran?”
“Kanthi
ngawontenaken bedhamen ing antawisipun Sang Prabu kaliyan Kangmas Panembahan
Ratu. Menapa Sinuwun sarujuk?”
“Saleresipun
kula piyambak ugi mboten remen wontenipun peperangan menika. Kula ugi rumaos
lingsem kanthi kadadosan menika. Nanging kados pundi malih.Pangeran.”
“Matur
nuwun ,Sinuwun. Ateges kula mboten ngrekaos pados marginipun bedhamen. Kula
kepengin supados Sang Prabu kersa bedhamen kaliyan Cirebon.”
“Perkawisipun
menapa Cirebon purun bedhamen kaliyan Sumedhanglarang.”
“Kenging
menapa mboten, sauger underaning prekawis dipun tuntasaken.”
“Kados
pundi pemanggih panjenengan ,Pangeran?”
“Miturut
pemanggih kula ingkang dados underaning prekawis menika Putri Harisbaya,
Kangmas Panembahan Ratu kaliyan Sang Prabu piyambak. Putri Harisbaya ngantos sapriki
tasih garwanipun sah Kangmas Panembahan Ratu. Nyolong Putri Harisbaya sami
mawon kaliyan ngloropaken kawibawanipun ratu Cirebon. Lan kanggene Putri
Harisbaya piyambak dados garwanipun Kangmas Panembahan Ratu menika mujudaken
kadadosan ingkang kalentu , amargi kasunyatanipun mboten samidene tresna.”
“Inggih,
kula rumaos getun ngengingi perkawis menika. Namung manawi kadakwa nyolong
Putri kula mboten sarujuk.
“Kenging
menapa?”
“Amargi
kula mboten ngajak. Nanging Putri
Harisbaya piyambak ingkang dherek dhateng Sumedhanglarang.”
“Lha
menawi ingkang dipun dhereki mboten kersa, tentu mboten saged dumugi ing
ngriki. Rak inggih ngaten ta?”
“Inggih,
kula ngrumaosi lepat. Lajeng kados pundi?”
“Wiwitanipun
Kangmas Panembahann Ratu kedah megat Putri Harisbaya langkung rumiyin. Lajeng Supados
penggalihipun mboten cuwa lan kawibawanipun mboten kirang, kedah dipun lintoni.”
“Lintunipun
menapa?”
“Dipun
lintoni pasiten ingkang jumbuh, umpaminipun setunggal desa ing Majalengka.
Kados pundi Sang Prabu?”
“Saestunipun
awrat sanget, amargi pasiten menika dipun darbeki mawi pangurbanan.”
Menika
perkawis ingkang ageng, Sang Prabu. Sang Prabu kedah ngurbanaken pasiten kangge
lintunipun Putri Harisbaya, tanpa ngurbanaken kawibawanipun Ratu Cirebon.
Menika nembe adil, Sinuwun.”
“Inggih
, manawi pancen sadaya wau kangge bedhamen ingkang langgeng kenging menapa
mboten sarujuk. Pancen sadaya menika mbetahaken pangurbanan. Wonten tetembungan
Jer basuki mawa beya.”
“Maturnuwun
manawi panjenengan Sarujuk. Ingkang salajengipun sumangga manggihi Putri
Harisbaya!”
“Kangge
menapa manggihi Putri Harisbaya?”
“Malahan
panjenenganipun menika kuncinipun perkawis.”
“Kersanipun,
kados pundi?”
“Kula
badhe nyuwun supados Putri Harisbaya nyerat nawala katur Kangmas Panembahan
Ratu. Ingkang suraosipun nyuwun supados piyambakipun dipun pegat kemawon.”
“O,
pikajengipun, talak?”
“Kasinggihan.
Kanthi mekaten wonten alesanipun Kangmas Panembahan Ratu megat piyambakipun.
Lan Serat talak dipun lintoni mawi pasiten setunggal desa ing Majalengka.”
“Inggih
kula sarujuk.Lajeng mbenjang menapa manggihi Putri Harisbaya?”
“Langkung
cepet langkung sae. Lan peperangan menika enggal dipun kendeli, supados mboten
tambah bebanten malih.Sesambetan Sumedhanglarang kaliyan Cirebon badhe wangsul
sae malih.”
“Manawi
dinten samenika ugi sumangga bidhal dhateng Kuthamaya , manggihi Putri
Harisbaya. Amargi Putri Harisbaya samenika cumondhok ing Kuthamaya.”
“Inggih,
sumangga kula namung dherek.”
Dina
kuwi uga Prabu Geusan Ulun sapengombyong lan Pangeran Wirasuta budhal menyang
Kuthamaya. Dheweke njujug ing Sasana kaputren Kuthamaya.
Putri
Harisbaya nemoni tamuni loro ing pendhapa Kaputren. Sanajan dandane mung
prasaja, nanging ayune katon sumunar.
“Kula
nuwun, Putri Harisbaya.”Ngendikane Pangeran Wirasuta.
“Mangga,
Kanjeng Sinuwun saha Pangeran Wirasuta.”
“Nyuwun
pangapunten,Putri. Kula tebih-tebih saking Cirebon saperlu ngupadi bedhamen ing
antawisipun Sumedhanglarang kaliyan Cirebon.”Kandhane Wirasuta.
“Inggih
menika, ingkang kula suwun.”Wangsulane Harisbaya.
“Kados
sampun dipun wuningani bilih peperangann menika kathah ruginipun katimbang
bebathenipun.Kajawi pangurbanan jiwa raga bandha donya ugi thukuling dendham
salajengipun.”
“Inggih
ketingalipun mekaten, Pangeran.”
“Lajeng
ingkang dados underaning perkawis menika, Putri Harisbaya piyambak, Sinuwun
Prabu Geusan Ulun lan Kangmas Panembahan Ratu.”
“Lajeng
kados pundi kersa panjenengan, Pangeran?”
“Saumpami
wekdal menika Kangmas Panembahan Ratu maringi Serat pegat dhumateng Gusti Putri
Harisbaya. Kula kinten perkawis menika
sampun rampung. Rak inggih ngaten ta?”
“Leres
sanget, Pangeran.”
“Kula
namung badhe nyuwun pirsa, menapa Gusti Putri Harisbaya sampun mboten kersa
dados garwanipun Kanjeng Panembahan Ratu ing
Cirebon?”
“Saleresipun
mekaten,Pangeran.”
“Menapa
mboten gerah penggalih manawi dipun pegat?”
“Mboten
,Pangeran. Malah langkung remen.”
“Lha
, menawi mekaten kula caos eguh pertikel.Samenika Gusti Putri damel nawala
ingkang suraosipun nyuwun dipun pegat.”
“Menawi
kedah mekaten marginipun kula badhe damel.”
“Inggih,
samenika kula tengga. Sumangga kula aturi enggal nyerat nawala katur Sinuwun
Panembahan Ratu.Ingkang suraosipun nyuwun kaparingan talak”
“Inggih
,kula suwun nengga sawetawis.”
Sawetara
wektu Sang Putri Harisbaya nulis layang tumuju marang Prabu Panembahan Ratu ing
Cirebon.
|
Kanthi
ati sing kumesar sang Putri Harisbaya nulis layang. Manawa Sang Prabu
Panembahan Ratu nyarujuki mesthi jejodhohane karo Prabu Geusan Ulun enggal
kaleksanan.
Pranyata
dalan sing luwih prayoga kuwi isih ana. Awake Putri Harisbaya rumangsa dadi
adhem panas. Atine antuk kabagyan.
Prabu
Geusan Ulun tuhu sawijining ratu kang ambek utama, sing ora wani gepok senggol
karo Putri Harisbaya. Dheweke banget anggone jaga dhiri supaya ora asring
ketemu, kapara malah mapan ana papan sing seje. Kabeh mau ditindakake supaya
ora nerak kutaman.
Sawise
layang kuwi rampung, age-age dipasrahake marang Pangeran Wirasuta.
“Maturnuwun,
Gusti Putri. Mugi-mugi Sinuwun Prabu Panembahan Ratu kersa ngudaneni panyuwun
panjenengan.”
“Inggih.
Mugi-mugi Sang Prabu tinarbuka manahipun satemah kersa maringi serat talak
kange kula.”
“Inggih
mugi-mugi mekaten.”
“Sabara
dhisik Dhiajeng, Muga –muga gegayuhane awake dhewe bisa enggal kaleksanan.”
Ngendikane Sang Prabu Geusan Ulun.
Katon
kembeng-kembeng waspane Putri Harisbaya. Kaya-kaya pengin njerit atine ngenteni
wektu kang kebak kabagyan kuwi.
Rombongan
Ratu Sumedhanglarang mlaku alon-alon ninggalake Kuthamaya. Bareng lakune tekan
ing prapatan dalan Pangeran Wirasuta nyuwun idi palilah bakal mulih menyang
Cirebon. Dene Prabu Geusan Ulun mulih menyang Dayeuhluhur.
Lakune
Pangeran Wirasuta nimnggalake Sumedhanglarang tumuju menyang Cirebon gangsar
ora ana alangan sawiji apa.Ora let suwe dheweke wis tekan Kedhaton Cirebon.
Tanpa
leren, Pngeran Wirasuta mbudidaya ngadhep Kangmase, Prabu Panembahan Ratu
ing sasana sumewa. Dheweke weruh mlebu
metune para Wiratamtama. Mesthine kabeh mau gegayutan karo anane peperangan
kuwi.
Saperangan
prajurit sing gugur ana payudan lan sing padha tatu oleh pangupakara sing
becik.Sajake cacahe prajurit bakal ditambahi,, supaya peperangan kuwi cepet
rampung.
Iki
ora kena dibacutake, kudu ana karampungan sing gumathok. Lan besuke ora
kadadean perang maneh.
Wirasuta
age-age mlebu ing sasana sumewa. Kepeneran Sang Prabu lagi lenggah rembugan karo
para Wiratamtama Cirebon.
“Kepiye
Kahanane ing payudan, Wiratamtama?” Pitakone Sang Prabu panembahan Ratu marang
Wiratamtama sing lagi ngadhep.
“Nyuwun
pangapunten, Sinuwun. Swasana tasih kados kala wingi. Mboten wonten ingkang
saged ngasoraken mengsahipun. Prajurit Sumedhanglarang pancenn kiyat. Nanging
prajurit Cirebon ugi awrat dipun trobos. Kekalihipun sami-sami kiyatipun.”
“Ya
yen mangkono prayoga ditambahi cacahe prajurit , supaya enggal bisa ngalahake
mungsuh.”
“Sendika
dhawuh, Sinuwun. Kula enggal badhe nglempakake para prajurit pilihan supados
enggal saged ngasoraken mengsah.”
“Ya,
tindakna ayahanmu kanthi becik.”
“Sendika
dhawuh ,Sinuwun.”
Wiratamtama
kuwi age-age mundur metu saka sasana sumewa.
Bareng
Sang Prabu Panembahan Ratu pirsa tekane
Wirasuta.Sang Prabu terus ndangu.
“Ayo Dhimas Wirasuta . kapara cedhak
pisowanmu.”
“Matur
nuwun, Kangmas Prabu.”
“Apa pisowanira bakal sabiyantu Pun Kakang, perang
mungsuh Sumedhanglarang, Dhimas?”
“Nyuwun
pangapunten, Kangmas Prabu. Kula mboten badhe ngrencangi perang”
“Geneya
ora . Lha kuwi rak wajib tumrape Si Adhi.”
“Kula
suwun peperangan menika dipun kendeli, Kangmas Prabu. Amargi badhe tuwuh
bebanten langkung kathah malih.”
“Lha
ngapa ,Dhimas. Perang iki gegayutan karo kawibawanku.”
“Kula
mangertos, Kangmas Prabu. Ewasemanten saksae-saenipun memengsahan,
langkung sae manawi sami kekadangan.
“Pancen
bener. Nanging dheweke sing wis ndhisiki golek perkara. Nyolong garwaku Putri Harisbaya.”
“Ewasemanten
sadaya wonten alesanipun, Kangmas Prabu.”
“Apa
menang –meneng Si Adhi wis nganakake panaliten?”
“Kula
namung badhe njejegaken perkawisipun.”
“Coba
yen Si Adhi pirsa apa underaning perkara ,Dhimas.”
“Awakipun
piyambak pirsa , manawi Putri Harisbaya menika mujudaken pisungsung saking Arya
Pangiri Pajang dhumateng Kangmas Prabu. Pikajengipun supados Pajang pasekuthon
kaliyan Cirebon. Mliginipun manawi Pajang ngadhepi mengsahipun.”
“Ya
, bener sliramu Dhimas.Terus,?
“Salajengipun
Kangmas Prabu mundhut garwa Putri Harisbaya, ewasemanten mboten dipun kantheni
raos tresna tinresnan. Namung sadremi netepi wajib supados mboten wonten
daredah ing antawisipun Cirebon kaliyan Pajang.”
“Ya
terus?”
“Sawetawis
menika, Putri Harisbaya sampun sesambetan katresnan kaliyan Pangeran Angka
Wijaya. Ingkang samenika jumeneng nalendra ing Sumedhanglarang jejuluk prabu
Geusan Ulun.”
“Iya,
dhimas. Terus?”
“Ateges
Putri Harisbaya kersa dhateng Cirebon amargi kapeksa dening Ratu Pajang.”
“Iya
, pancen kaya ngono.”
“Kanthi
mekaten, peladosanipun dhumateng panjenengan mboten ngremenaken ing penggalih.”
“Sliramu
bener, Dhimas.”
“Lha
nalika Prabu Geusan Ulun mertamu dhateng Cirebon, Katresnanipun ingkang sampun
kependhem temah kagigah malih. Thukul tekadipun dherek Geusan Ulun dhateng
Sumedhanglarang.”
Sang
Prabu mung manthuk.
“Kula
nyuwun pirsa, namung kula suwun dipun wangsuli kanthi tulusing penggalih.”
“Apa,
Dhimas?”
“Menapa
Kangmas saestu tresna dhumateng Putri Harisbaya?”
“Terus
terang aku ora tresna, Dhimas.”
“Lajeng
kados pundi manawi Putri Harisbaya nyuwun pegat?”
“Hm.
Kepiye ya? Pancen prayogane dak pegat wae.”
“Leres,
ngaten menika?”
“Iya
bener, Sauger metu saka karepe Putri Harisbaya dhewe.”
“Saumpami
Putri Harisbaya sampun dipun pegat. Menapa peperangan badhe dipun lajengaken?”
“Ya
, mesthi wae ora. Amarga sing dadi perkara kuwi Putri Harisbaya isih dadi
garwaku.”
“Manawi
ngaten kula sarujuk kaliyan pamanggih panjenengan.”
Panembahan
ratu ora ngerti kekarepane Wirasuta sing satemene. Nanging penemune kabeh mau
pancen bener.
“Kangmas
Prabu, sejatosipun wiwit nalika peperangan dipun adani, kula sampun migatosaken
lampahing peperangan. Kula tingali mawi netra kula piyambak bilih peperangan
menika imbang. Mboten wonten ingkang kawon, ugi mboten wonten ingkang mimpang.
Saumpami mimpang mesthinipun kathah bebantenipun, langkung-langkung manawi
kawon tentu kurbanipun langkung kathah malih.”
“Paramila
awit saking punika kados pundi saumpami peperangan menika dipun kendeli lan
ngawontenaken bedhamen kemawon kaliyan Sumedhanglarang. Kangmas Prabu tentu
pirsa Sumedhanglarang menika kala emben sae sesambetanipun kaliyan Cirebon.
Ewasemanten kenging menapa namung perkawis wanita kemawon temah dados
peperangan.
“Ya saiki aku ngerti karepmu. Saiki aku kudu
kepiye?”
“Samenika,
kula suwun dipun waos serat menika rumiyin!”
“Layang
saka ngendi?”
“Saking
Putri Harisbaya.”
Sang
Prabu tumuli maca layange Putri Harisbaya. Sabanjure ditaliti apa kekarepane.
Layang panyuwunan marang Panjenengane , supaya Putri Harisbaya dipegat. Amarga
palakramane wis ora bisa diterusake maneh.
“Iya,
bakal dak udaneni panjaluke. Nanging saka ngendi Dhimas oleh layang iki?”
“Kula
nembe kemawon saking Sumedhanglarang lan kepanggih kaliyan Sang Putri.Kula
nyuwun pirsa ngengingi tekadipun. Pranyata pancen leres , piyambakipun mboten
saget nglajengake jejodhohanipun kaliyan Kangmas Prabu.”
“Kepiye
tanggapane Geusan Ulun?”
“Pajenenganipun
ugi sarujuk ngawontenaken bedhamen.”
“Ya
yen ngono, becike nglereni peperangan luwih dhisik.”
“Menapa
mboten cuwa mbenjangipun, Kangmas Prabu?”
“Ora.”
“Inggih
manawi mekaten samenika Kangmas Prabu damel nawala dhawuh dhateng Senapati
Wiralodra supados ngunduraken prajurit saking tapel wates negari.Perang dipun
kendeli , lan perkawis menika sampun dipun sarujuki Geusan Ulun.”
“Ya
yen mangkono dak tulise layange.”
Sang
Prabu age-age nyerat nawala kang ditujokake marang Senapati Wiralodra supaya
wiwit dina iki peperangan dilereni. Para prajurit Cirebon diundurake saka
tapelwates.
Marang ingkang kinasih
Senapati Wiralodra lan para prajurit.
Ing glanggang payudan
Nuwun,
Kanthi nawala iki ingsun dhawuhake marang
para Senapati , Tumenggung, Wiratamtama lan Prajurit Cirebon, sing lagi padha
bebela negara ngadani perang, mungsuh Sumedhanglarang.
1. Nglereni peperangan mungsuh Sumedhanglarang.
2. Ngundurake prajurit saka tapel wates negara.
Amarga Ingsun bakal nganakake bedhamen
karo Sumedhanglarang.
Muga tansah manggih yuwana awit sihing
Gusti.
Nuwun.
Panembahan Ratu
Panguwasa Cirebon.
“Dhimas
Wirasuta. Aja wedi kangelan ing wengi
iki uga sira dak utus ngeterake nawala iki menyang tapel wates.
“Sendika dhawuh,Sinuwun.”
8.Dhaupe
Geusan Ulun
P
|
angeran Wirasuta
ngrasuk busana kapangeranan Cirebon. nitih kudha didhrekake saperangan para
Wiratamtama. Lakuning barisan dipangarsani dening prajurit sing nggawa
umbul-umbul lambang keagungan Cirebon. Kawula sing padha ngulati padha gumun.
Mesthi ana kadadean wigati sing kelakon, nanging kadadean apa? Saiki lagi ana
peperangan antarane Cirebon lan Sumedhanglarang ing tapel watese negara. Apa
peperangane wis rampung kanthi kamenangane Cirebon?
Prajurite
Wirasuta tekan tapel watese negara wayahe wis surup. Nalika kuwi perang
dilereni , lan para prajurit padha lerem ana pesanggrahane.
Saperangan
Prajurit padha kaget , amarga sing teka Pangeran Wirasuta adhine kandhung Sang
Prabu Panembahan Ratu. Age-age Panglima Wiralodra mangayubagya rawuhe.
“Wilujeng
rawuh, Pangeran.” Kandhane Wiralodra.
”Wilujeng,
para Senapati lan Wiratamtama.”
“Wonten
dhawuh menapa Pangeran rawuh ing papan mriki?”
“Aku
ngemban dhawuh Sinuwun Prabu Panembahan Ratu.”
“Mangga
, menapa ingkang kadhawuhaken?”
“Dhawuh
Dalem wis sinerat ana ing layang iki. Mula kuwi wacanen sing sora dimen padha
bisa ngrungokake kanthi cetha.”
Kanthi
rada gugup Panglima Wiralodra maca nawala saka Gusti prabu Panembahan Ratu.
Para
prajurit kaya-kaya ora percaya krungu dhawuhe ratu Gustine kuwi. Nanging layang
kuwi dudu layang palsu. Apa maneh sing nggawa dudu sadhengah pawongan nanging
Kanjeng Pangeran Wirapati adhine kandhung Sang Prabu dhewe.
Ya
arep kepiye maneh, amarga satemene pucuking panglima Sang Prabu dhewe.Manawa
panjenengane wis netepake nglereni perang, ora ana dalan liya kajaba ngestokake
dhawuh.
|
“Pangeran,
Sasampunipun kula maos nawala saking Sinuwun, kula namung sendika dhawuh.”
“Matur
nuwun, Panglima.Yen ngono age enggal undurna.”
“Sendika, Pangeran.”Panglima Wiralodra dhawuh
marang senapatine telu supaya prara prajurit kadhawuhan mbongkar kemahe lan
tata-tata ubarampening perang. Sesuk esuk kudu wis ninggalake tapel watese
negara mulih menyang Cirebon.
Para
prajurit padha tata-tata bali kanthi ora kumecap apa-apa. Mung padha tuwuh
tandha pitakon geneya peperangan kudu di endhegake. Sawetara liyane ana sing
ngaturake suka syukur amarga kepiye wae perang karo Sumedhanglarang kuwi padha
karo perang karo sedulure dhewe.
Para
prajurit padha seneng amarga kepiye wae perang kuwi bakal nuwuhake pangurbanan
tumrap sing menang utawa sing kalah.
Ganti
kang cinarita , ora kaya sing ana pensanggrahane Prajurit Sumedhanglarang.
Nalika samana wancine isih esuk Patih Jaya Prakosa nampa palapurane sawijinig
prajurit.
“Nyuwun
pangapunten Gusti Patih.”
“Ana
apa prajurit?”
“Wonten
satunggaling keanehan, Gusti.”
“Keanehan
apa, Prajurit?”
“Pesanggrahan
Prajurit Cirebon sampun dipun bongkar.”
“Apa
bakal miwiti perang?”
“Mboten
, Gusti Patih.”
“Lha
kepiye?”
“Ing
glanggang payudan mboten wonten gelaring perang, nanging prajurit Cirebon
sadayanipun sampun mboten wonten.”
“Lho
kok aneh temen. Pada menyang ngendi?”
Swasana
kaya ngono kuwi mesthi gawe cingake Prajurit Sumedhanglarang.Dheweke rumangsa
kelangan mungsuhe dumadakan.
Jaya
Prakosa age-age nimbali Senapati Wiradijaya, Senapati Kondhang Hapa lan senapati Pancar Buwana. Sateruse para
senapati kuwi padha mertinjo menyang pesanggrahane Prajurit Cirebon. Pranyata
pancen bener, manawa para prajurit Cirebon wis padha lunga. Apa dheweke sengaja
mundur? Utawa ana sabab liya?Apa sing kudu ditindakake?Apa isih padha bakal ana
papan kuwi?
Nalika
para Senapati bali menyang pesanggrahane Prajurit Sumedhanglarang, dumadakan
jumedhul saka sisih kulon sawijining kudha. Kudha kuwi ditumpaki sawijining Prajurit
saka Dayeuhluhur.
Para
prajurit age-age menehi dalan supaya Sang Dhuta bisa gampang liwate. Utusan
kuwi mlumpat saka gigiring turangga lan age-age matur ing ngarsane Patih Jaya
Prakosa.
“Nyuwun
pangapunten, Gusti Patih. Kula Dhuta saking Gusti Prabu Geusan Ulun.”Ature
prajurit Dhuta.
“Iya
ana apa, Prajurit Dhuta?”
“Kula
caraka, mbeta nawala dhawuh saking Gusti Prabu.”
“Enggal
aturna nawalane!”
“Menika
Gusti Patih.”
Patih
Jaya Prakosa age-age mbukak layang kuwi lan terus wiwit diwaca. Surasaning
nawala kanggone Patih Jaya Prakosa, prasasat swaraning bledhek nyamber ing
wayah awan.
“Apa?
Kudu mundur?Aku ora ngandel.
“Leres,
Gusti Patih. Menika nawala dhawuh saking Sinuwun Prabu Geusan Ulun, ingkang
kedah kula aturaken Panjenengan.”
“Coba
wacanen, Pancar Buwana! Apa layang iki palsu?”
“Sendika,
Kakang Patih.”
Senapati
Pancar Buwana age-age maca nawala kuwi, saka dhawuh Panglima sing dhuwur dhewe
ing negara Sumedhanglarang.
Sawise
ngulati cap Kraton lan tulisane, wis cetha manawa layang kuwi layang asli.
Diserat Gusti Prabu Geusan Ulun dhewe.
Katur Ingkang Kinurmatan
Panglima Perang Sumedhanglarang
Eyang Patih Jaya Prakosa.
Kahiring pakurmatan,
Kanthi nawala menika kula panguwasa
Sumedhanglarang minangka Panglima Paling Inggil handhawuhaken.
1.Ngendhegaken peperangan mengsah
Cirebon.
2.Ngunduraken
sadaya Prajurit dhateng Kuthagara.
Salajengipun
kangge ngrampungaken underaning perkawis, Cirebon kaliyan Sumedhang larang
badhe ngawontenaken bedhamen.
Matur nuwun.
Geusan Ulun
Panguwasa
Sumedhanglarang
“Manawi
ningali seratan saha cap Kraton, nawala menika asli, Kakang Patih.”Kandhane
Senapati Pancar buwana karo menehake layang kuwi marang Senapati liyane.Kanthi
mangkono para Senapati padha maca gentenan. Sajake Patih Jaya Prakosa ora lila
manawa Prajurit kadhawuhan mundur. Amarga satemene dheweke bakal males wirang
marang Prajurit Cirebon sing wis ngrubuhake Kraton Pajajaran.
Patih
Jaya prakosa satemene pengin mbalekake jayaning Pajajaran sing wis sirna kalah
dening pangesuking Kraton Islam.
“Dhimas
Pancar Buwana, Aku ora sarujuk ngenani perkara iki . Mulane aku dak dhisiki
laku bali menyang Dayeuh luhur, nyuwun pirsa kersane Sinuwun. Bregadaning
Prajurit dak pasrahake marang SiAdhi lan para senapati liyane. Borong anggonmu
ngundurake para Prajurit .”
“Sendika
dhawuh, Kakang Patih.”
Patih
Jaya Prakosa age-age mlumpat menyang gigiring turangga. Sabanjure nggeret
kendhalining kudha satemah kudha titihane kuwi mlayu nggemprang banter banget
mulih menyang Dayeuhluhur kanthi rada mangkel atine.
Pancar
Buwana mung gedheg-gedheg ngulati patrape kangmase sing kebak kanepson kuwi.
Dheweke age-age rembugan karo Senapati liyane.Lan wiwit wektu kuwi pasanggrahan
dibongkar. Peperangan wis paripurna, tanpa dingerteni ngendi sing menang lan
endi sing kalah.
Sepuluh
dina candhake ing sawijining dina kang wis ditentokake ana kadadean wigati
tumrap kawula ing Sumedhanglarang lan Cirebon. Negara loro kuwi bakal nganakake
bedhamen.
Nalika
samana ing sawijining desa wewengkon Kecamatan Majalengka sing isih kebawah
Sumedhanglarang sisih wetan. Mujudake tapel watese karo Kraton Cirebon sing
lemahe subur lan makmur bakal dianankake bedhamen utawa winastan sidhang.
Ing
bangsal agung kang wis digawe maligi bakal dianakake prastawa wigati sing
magepokan karo bedhamen ing antarane Karaton Sumedhanglarang lan Cirebon
sing lagi padha daredah.
Ing
sadalan-dalan tumuju bangsal agung dipasang umbul-umbul manekawarna. Sesawangan
katon semuwa mratandhani lamun ing kono bakal diananake sawijining pesta
gedhen.
Nalika
srengengene wis sagenter dhuwure, katon saka sisih kulon ana sawijining kreta
kencana sing digeret jaran loro, diiringi dening prajurit turangga.
Ing
sisih ngarep an aprajurit loro sing pinangka pucuking laku.Sawurine kreta kudha
sing dititihi sawijining Putri karo embane.
Ing
sawurine maneh ana Jejaka bagus rupane nanging mengku prabawa sing gedhe. Nitih
turangga pepilihaning kudha.
Yakuwi
rombongane Prabu Geusan Ulun saka Dayeuhluhur.Sing lungguh ana sajeroning kreta
,Putri Harisbaya karo embane. Rombongann cilik kuwi terus mlaku tumuju menyang
desa mapane bangsal agung.Kawula sing padha ana sadalan-dalan tansah ngelu-elu
marang Ratu gustine kang kepareng tedhak ing papan kuwi. Prastawa kaya ngono
kuwi langka banget kelakone.Sawijining nalendra kepareng bakal mertinjo menyang
desa kluthuk ing wewengkone .
Bareng
karo wayahe, saka sisih wetan, jumedhul rombongan saka Cirebon.Rombongan cilik
kuwi dipangarsani dening Kanjeng Panembahan Ratu, diampingi Pangeran Wirasuta.
Rombongan Cirebon kuwi ora nggawa prajurit segelar sepapan kaya dene rombongan
saka Sumedhanglarang.
Rombongan
loro mau wis tekan bangsal agung sing digawe maligi kanggo Sidhang. Sidhang
antarane priya lan wanita sing padha omah-omah utawa pepasihan utawa kasih
sinisihan. Mula papan kono katelah Sidhangkasih.
Priyagung
sing padha lungguh ana bangsal agung
kuwi, Prabu Panembahan Ratu sing diamping-ampingi Pangeran Wirasuta. Putri
Harisbaya sing diampingi embane. Lan Prabu Geusan Ulun.
Tatacara
Bedhamen ing antarane Kraton Sumedhanglarang lan Cirebon dipurwakani. Sing sesorah
dhisik Sang Prabu Geusan Ulun.
“Ingkang
Kinurmatan Prabu Panembahann Ratu saking Cirebon, Pangeran Wirasuta ingkang
kula urmati lan para pangombyong saking Cirebon ingkang bagyamulya sarta Para
kawulaningsun ing Sumedhanglarang. Ing dinamirunggan iki ingsun ngrawuhake Sang
Prabu Panembahan Ratu saka ing Cirebon saperlu bakal ingsun ajak nganakake
bedhamen. Kaya dene wis padha disumurupi manawa pirang-pirang dina kepungkur
prajurit Sumedhanglarang lan Cirebon padha peperangan ing tapel watese negara Sumedhanglarang
lan Cirebon.”
“Sawise
ingsun penggalihake kanthi weninging ati , mula ingsun sakarone Sarujuk
ngendhegake peperangan.Muga-muga ing dina-dina candhake kadadeyan kaya mangkono
ora ana maneh. Lan sabanjure kraton loro bakal urip tetanggan pinangka negara
sing mardika sing tansah padha urmar kinurmatan.Sabanjure manawa kabeh wis
padha sarujuk bakal dibacutake ngenani underaning perkara sing anjalari
dumadine peperangan.”
“Nanging
sadurunge kuwi ingsun uga kepengin midhanget pemanggihe Kanjeng Panembahan Ratu
ing Cirebon ngenani bedhamen iki. Bakune ingsun sarujuk lan ora bakal nganakake
peperangan maneh.”
“Sakirane
samene dhisik sambutan ingsun minangka panguwasa ing Sumedhanglarang. Lan saiki ayo padha dimirengake pangandikane
Sang Prabu Panembahan Ratu Cirebon.”
“Nuwun.”
Kabeh
sing ana kono padha seneng atine bareng krungu sesorahe Prabu Geusan Ulun.
Putri Harisbaya katon mesem ngulati Prabu GeusanUlun.
Sabanjure
Pangeran Wirasuta caos sasmita marang Prabu Panembahan Ratu supaya sesorah.
“Ingsun
Prabu Panembahan Ratu panguwasa Cirebon adoh-adoh teka kene amarga kepengin
ngrampungi peperangan lan nganakake bedhamen karo Sumedhanglarang....”
“Nuwun.”
Bareng
ratu loro wis padha sesorah ngetokake pangunekuneke, Pangeran Wirasuta terus
mangarsani bedhamen.
Pangeran
Wirasuta nyuwun sing padha ora diperlokake supaya sumingkir sawetara saka bele
agung .Sabanjure sing padha rembugan ana kono mung antarane Pangeran Wirasuta,
Prabu Geusan Ulun, Prabu Panembahan Ratu lan Putri Harisbaya lan sawijining
pengulu Kraton Sumedhanglarang.
“Pak
pengulu, seksenana , Ingsun bakal takon karo garwaku Putri Harisbaya.”
Pengendikane Prabu Panembahan Ratu.”
“Sendika,
Sinuwun Prabu Panembahan Ratu.”Ature Pengulu.
“Dhiajeng
putri Harisbaya.Sliramu wis kirim nawala saperlu nyuwun pegat. Apa wis
dipikirake becik lan orane?”
“Sampun,
Sinuwun Prabu Panembahan Ratu.”
“Yen
mangkono ingsun dhawakake talak sepisan.”
“Kula
tampi sinuwun.”
“Kula
sadaya nyekseni “ Kandhane Pangeran Wirasuta, Prabu Geusan Ulun lan Pengulu.
“Manawi
sampun telas mangsa idahipun iggih menika tigang wulan sedasa dinten
panjenengan sampun saged krama malih.”
Wiwit
dina kuwi Putri Harisbaya wis dadi warandha.Uwal saka pangikete palakrama karo
Prabu Panembahan Ratu.
Sabanjure
Prabu Geusan Ulun ngandika.
“Sinuwun
Prabu Cirebon, Menapa panjenengan remen mapan wonten ing Sidhangkasih menika?”
“O,
mesthi kemawon, sang Prabu Sumedhanglarang. Kula remen papan menika awit
pasitenipun subur makmur, kawulanipun sami grapyak lan semanak tuwin sesawangan
ingkang indah.”
“Sokur
bage, manawi mekaten wiwit wekdal menika Sidhangkasih kula pasrahaken dhumateng
panjenengan supados winengku kraton Cirebon.”
|
“Matur
nuwun,Menapa saestu kanthi tulusing penggalih?”
“Kula
ngaturaken kanthi remening penggalih.”
“Matur
nuwun dhumateng Sang prabu Geusan Ulun tuwin Sang Prabu Panembahan Ratu
ingkangv sampun ngawonteaken bedhamen. Ingkang salajengipun murih sadaya wau
wonten kekiyataning pranatan, Pramila badhe kadamelaken prajanjen. Samangke
Sinuwun Prabu kekalih kula suwun tapak asma.”Ature Pangeran Wirasuta.
“Sendika
Pangeran.”” Iya Dhimas”.Wirasuta.”
Sawise
Ratu loro padha tapak asta pasowanan dibubarake. Sabanjure padha kondur menyang
asale dhewe-dhewe kanthi kebak kabagyan.Prabu Panembahan Ratu oleh tambahan
wewengkon Sidhangkasih. Dene prabu Geusan Ulun oleh putri Harisbaya randhane
ratu Cirebon.
Enem
sasi candhake ing Kedhaton Dayeuhluhur dianakake pawiwahan dhaupe Prabu Geusan Ulun lan Putri Harisbaya.
Pahargyan
dianakake kanthi semuwa sajrone pitung dina pitung bengi. Kabeh budaya sing ana
ing tlatah Sumedhanglarang dipentasake.
|
Pasangan
penganten kuwi padha ngrasakake kabagyan sing wis sawetara wektu
ditunggu-tunggu.
Ora
kurang saka pitung tahun anggone padha ngenteni, pancen wektu semono kuwi
rasane suwe banget. Rasa sabar lan tabah tawakal wae sing wis bisa nguwohake
kabagyan sing padha dialami saiki.
Nanging
ing sawijining dina nedheng-nedhenge Prabu Geusan Ulun dadi manten. Ngrasakake
bagya mulya sesandhingan karo Garwane Putri Harisbaya ana sawetara perkara ngenani
ora sarujuke Patih Jaya Prakosa marang
Sang Prabu Geusan Ulun anggone nganakake bedhamen.
Kaya
dene wis padha disumurupi manawa, Patih Jaya Prakosa satemene ora sarujuk karo
ananing bedhamen antarane Cirebon Lan Sumedhanglarang.Amarga dheweke duwe
gegayuhan pengin ngobrak-abrik Kraton Cirebon sokur bage bisa ngrubuhake.
Nalika
dhaupe Prabu Geusan Ulun Patih jaya Prakosa ora nunggoni malah dheweke lunga
menyang ing Kuthamaya. Wong lanang tuwa tilas pejuang Pajajaran kuwi rumangsa
kuciwa atine amarga kekarepane ora bisa keturutan , Anggone bakal ngrubuhake Kraton
Cirebon ora bisa kaleksanan katambah adhi-adhine nalika diajak menyang
Kuthamaya ora ana sing melu.
Dheweke
nyawang wit Hanjuang sing biyen ditandur ing alun-alun, nalika jumenenge Sang
Prabu Geusan Ulun.Ora ana pawongan siji-sijia wae. Sajake kabeh kawula ing
sakiwa tengene Kuthamaya padha menyang Dayeuhluhur nonton dhaupe Ratu Gustine.
Patih
Jaya Prakosa ndelengi Wit hanjuang kuwi kanthi kebak gumun. Wit kuwi urip
subur, godhonge ngrembuyung .
Kuwi
mratandhani manawa satemene Kuthamaya pantes didadekake Pakuan.Yakuwi pakuan sing anyar. Nanging kena apa Sang
prabu Geusan Ulun ora kersa malah luwih seneng Dayeuhluhur minangka Kuthagara.
Banget gawe kuciwane.
Kanthi
jangkahing suku sajak lesu, Jaya Prakosa mlaku mangetan datan rinasa tekan
salerenging gunung. Lan ing lereng gunung kuwi dheweke weruh peluk werna putih
metu saka pucuking gunung . Dheweke ngadek sawetara suwe ana papan kuwi.
Para
kawula sing padha nyumurupi ngadege Sang Patih Jaya Prakosa terus menehi jeneng
gunung kuwi Gunung Pengadegan. Gunung
papane Eyang Jaya Prakosa jumeneng utawa ngadeg.
Nanging
suwe-suwe mapan ana papan kuwi dheweke rumangsa bosen. Dheweke nglengganani
manawa nesune kuwi ora bakal gawe owah-owahan,nanging malah ngentekake tenaga
sing tanpa piguna.
Wusanane
dheweke netepake bali menyang Dayeuhluhur. Ana sawjining kalodhangan sing becik
Patih Jaya Prakosa sowan menyang ngarsane Prabu Geusan Ulun. Nalika samana
Prabu Geusan Ulun lagi lelenggahan karo garwane Putri Harisbaya.
“Gusti
Prabu, menapa Sinuwun tasih mbetahaken kula?”
“Kenging
menapa Eyang Patih ngendika mekaten?Ngantos wekdal menika, Eyang Patih tasih
kula betahaken lan kula anggep pinangka sesepuh kula saha sesepuhing
Sumedhanglarang.”
“Ewasemanten
pemanggih kula kalamangsa benten kaliyan pemanggihipun Sinuwun Prabu.”
“Babar
pisan mboten, Eyang. Eyang menika kekiyataning Kraton Sumedhanglarang. Sadaya
tentu sampun pirsa. Sanget ageng labuh labetipun Eyang patih dhateng Kraton
Sumedhanglarang. Perkawis menika mboten badhe kula lirwakaken.Namung menawi
kepareng kula badhe nyuwun pirsa kenging menapa nalika kula dhaup Eyang Patih
mboten nenggani?”
“Nyuwun
pangapunten, Sinuwun. Nalika semanten dumadakan kula rumaos sedhih, sedhih
sanget amargi rancangan kula mboten salaras kaliyan kasunyatanipun. Kula kepengin
Sumedhanglarang menika dados Pajajaran kapindho Ingkang kuncara sak nuswantara”
“Inggih
Eyang. Mbokbilih lampahing sujarah
benten.”
“Mboten,Sinuwun.
Kula sampun ningali pratandha ingkang wonten ing Kuthamaya.”
“Tandha
menapa Eyang?”
“Wit
hanjuang ingkang kula tanem ing Kuthamaya nalika jumenengan paduka, saged gesang subur. Ronipun ngrembuyung
menika mujudaken pratandha bilih ing Kuthamaya, Pajajaran saget dipun bangun
malih.”
“Kenging
menapa Eyang patih kagungan pemanggih mekaten?”
“Amaragi
nalika semanten, Kakek buyut kula nanem Hanjuang ing alun-alun Pakuan Pajajaran.
Lan wit menika saged gesang subur sadangunipun Pajajaran Jaya.
“Nanging,
nyuwun pangapunten Eyang Patih. Sadaya menika wonten panguwaosipun Gusti
Ingkang Maha Gesang.”
“Nanging,Sinuwun,kula
tasih pitados perkawis ngaten menika.”
“Eman
sanget Eyang.Kuthagara sampun dipun pindhah dhateng Dayeuhluhur.Tegesipun
Kuthamaya mboten dados kuthagara malih.Inggih sampun Eyang mboten sisah dipun
penggalihaken. Ingkang sampun kepungkur kersanipun sumimpen samenika sumangga
makarya kangge kemajenaganing Sumedhanglarang.”
Tamat